Англия Премьер-лигасининг 6-туридан ўрин олган жозибали баҳсда «Тоттенҳем» ўз майдонида «Вулверхемптон»га қарши баҳс олиб борди. Курашларга бой бўлган ўйин якунида рақиблар 1:1 ҳисобидаги дурангга рози бўлишди.
Учрашувнинг дастлабки қисмида ҳар икки жамоа эҳтиёткор ўйин услубини танлади. «Тоттенҳем» майдонда тўпга кўпроқ эгалик қилган бўлса-да, «Вулверхемптон» кескин қарши ҳужумлар орқали хавф туғдирди. Биринчи бўлим ҳисоб очилмаган ҳолда якунланди.
Иккинчи тайм бошланиши билан меҳмонлар таъсирчан ҳаракат қилди ва 54-дақиқада Сантяго Буено аниқ зарбаси билан дарвозани ишғол этиб, «Вулверхемптон»ни ҳисобда олдинга олиб чиқди. Ушбу голдан сўнг «Тоттенҳем» устунликни қўлга олишга ҳаракат қилди, аммо рақиб ҳимоячилари узоқ вақт уларга имконият бермади.
Шу ҳолда ўйин якунланади, деб ўйланган бир вақтда, 90+4-дақиқада Жоау Палинья саҳнага чиқди. Унинг голи «Тоттенҳем»ни катта йўқотишдан асраб қолди ва жамоа мухлисларини сўнгги дақиқаларда қувонтиришга муваффақ бўлди.
«Тоттенҳем» — «Вулверхемптон» 1:1
Голлар: Палинья (90+4) — Буено (54).
Тоттенҳем — Викарио, Спенс (Порро, 63), Ромеро, Ван де Вен, Удоги (Тел, 84), Палиня, Бентанкур (Жонсон, 62), Қўдус, Бергвалл (Сарр, 78), Симонс (Одоберт, 78), Ришарлисон.
Вулверхемптон — Жонстон, Доэрти (Агбаду, 46), Буено, Крейчи, Буено, Гомес (Беллегард, 64), Андре, Ариас, Мунецци, Ҳванг (Чатчуа, 46), Ларсен (Арокордаре, 84).
Шу тариқа, «Тоттенҳем» 11 очко билан турнир жадвалида 3-поғонага кўтарилди. «Вулверхемптон» эса фақат 1 очко билан сўнгги ўринда қолиб кетди.
Ўйиндан кейин мутахассислар икки жамоанинг ҳам характерини алоҳида таъкидлаб ўтишди. «Тоттенҳем» охирги дақиқаларгача курашишдан тўхтамади, «Вулверхемптон» эса ҳужумда кўрсатган иродаси билан мухлисларнинг олқишига сазовор бўлди.
«Замин»ни Telegram’да ўқинг!
