Ўз вақтида “Бунёдкор” сафида ҳам тўп сурган, 2008, 2009 ва 2010 йилларда жамоа билан мамлакат чемпиони бўлган афсонавий бразилиялик футболчи Ривалдо замонавий футболнинг энг ёш юлдузларидан бири ҳисобланган “Барселона” етакчиси Ламин Ямалга қимматли маслаҳатлар берди. Унинг фикрича, Ямалнинг келаси йилда “Олтин тўп”ни қўлга киритиш имкониятлари жуда юқори.
Ривалдо Испаниянинг Sport.es нашрига берган интервьюсида:
«Ламинда келаси йилда “Олтин тўп”ни ютиш учун барча зарур сифатлар мавжуд. Мен унинг жорий мавсуми аввалгисидан анча ёрқин ва самарали бўлишини кутяпман. Ямал бутун дунёга ўзининг ўйин услубини намойиш этиш билан чекланиб қолмаслиги керак. У мунтазам кўп гол урсин, жамоадошларига голли узатмаларни кўпайтирсин. Илгари Криштиану Роналду ва Лионель Месси ҳам шу йўл билан катта марраларга етишган эди», – дея таъкидлади.
Маълумки, Ривалдонинг ўзи 1999 йили “Милан” сафида тўп сурар экан, йилнинг энг яхши футболчиси сифатида тан олинган ва нуфузли “Олтин тўп” совринини қўлга киритган.
Эслатиб ўтамиз, 2025 йилги “Олтин тўп” тақдимотида Ламин Ямал иккинчи ўринни эгаллади. Бу йилги соврин эса ПСЖ ҳужумчиси Усмон Дембелега насиб этди.
Шу тариқа, Ривалдо маслаҳатлари Ямал учун нафақат руҳий қўллаб-қувватлаш, балки янги мақсадлар сари йўл харитаси сифатида хизмат қилиши мумкин. Ёш иқтидор эътибор ва меҳнатини тўғри йўналтирса, келаси мавсум “Олтин тўп”нинг навбатдаги соҳибига айланиши эҳтимолдан холи эмас.
«Замин»ни Telegram’да ўқинг!
