«Бенфика» клуби бош мураббийи, тажрибали мутахассис Жозе Моуринью Чемпионлар Лигасининг янгича формати ҳақида ўз фикрларини билдирди. Унинг сўзларига кўра, бу тизимда бир қатор ижобий жиҳатлар бор, шу билан бирга баҳсли нуқталар ҳам мавжуд.
Моуринью шундай деди:
«Мен ҳали ҳам бу тизимни тўлиқ ўрганиб чиқиш билан бандман. Шу боис, қайси вариант – олдинги услубми ёки ҳозиргисини афзал кўриш ҳақида қатъий хулоса чиқаришга шошилмайман. Янги тартиб бутунлай бошқача ёндашувни тақозо қилади. Европа Лигасининг ўтган мавсумида шунга яқин форматда иштирок этганман ва тан олишим керак, у жуда қизиқарли ҳамда замонавий кўринишда тузилган».
Шу билан бирга, мураббий айрим камчиликларга ҳам эътибор қаратди:
«Форматда бироз мантиқсизликлар йўқ эмас. Масалан, сиз ҳар бир рақиб билан фақат битта ўйин ўтказасиз. Агар бу ўйин сафарда бўлса, уйда ўйнаш имкониятидан маҳрум бўласиз. Бу эса ноқулай вазиятга олиб келиши мумкин. Шунингдек, турнир жадвалида аввал ҳеч қачон тўқнаш келмаган жамоаларга жой берилиши ҳам ғайриоддий ҳолат. Бу бироз тушунарсиз ва кўп саволлар уйғотади».
Шу билан бирга, Моуринью янги тизимнинг кучли жиҳатларини ҳам қайд этди:
«Албатта, ушбу формат футбол учун янги имкониятларни очиб беради. Сиз бир мавсумда саккиз хил рақиб билан куч синашасиз. Бу эса турнирга қизиқишни оширади ва мухлислар учун янада кўпроқ интрига яратади. Фақат бу ўзгаришларга мослашиш учун вақт талаб этилади», — дея таъкидлади машҳур мутахассис.
Айни пайтда, «Бенфика» учун асосий синовлар олдинда кутмоқда. Жамоа Чемпионлар Лигасидаги навбатдаги баҳсини 30 сентябрь куни Лондонда ўтказади. У ерда уларни Англиянинг йирик клубларидан бири — «Челси»га қарши оғир учрашув кутиб турибди. Бу беллашув нафақат «Бенфика», балки Моуриньюнинг янги форматга қай даражада мослаша олишини ҳам синовдан ўтказади.
“Zamin”ни Telegram'да ўқинг!
