Луис Энрике бошчилигидаги “ПСЖ” Европа Чемпионлар Лигаси гуруҳ босқичи доирасидаги кескин тўқнашувда ўз собиқ жамоаси “Барселона”ни 2:1 ҳисобида мағлуб этди. Париж клуби ўз майдонида кучли ўйин намойиш этиб, турнинг энг катта воқеаларидан бирига айланди.
Учрашувдан сўнг каталонияликлар ҳимоячиси Жюль Кунде BBC вакиллари билан суҳбатда жамоанинг имкониятлари етишмаганини ва рақибнинг устунлигини очиқ тан олди.
“ПСЖ биздан жисмоний жиҳатдан кучлироқ эди. Биз режалаштирганимиздек доимий босим ўтказа олмадик. Менимча, шу жиҳатда камчиликка йўл қўйдик. Бир нарсани таъкидлаб ўтмоқчиман: рақиб жуда юқори савияда ўйнади. Биз албатта натижадан хафамиз, аммо ҳайрон қолмадик. Чунки уларнинг даражаси юқори эканини олдиндан ҳам биламиз. “ПСЖ” ўз кучига ишонадиган, индивидуал маҳорат даражаси юқори футболчиларга эга. Улар Чемпионлар Лигаси ғолиби бўлишга ҳақли жамоа эканини яна бир бор намойиш қилди. Бу жуда оғир баҳс бўлди, лекин улар биздан яхшироқ ҳаракат қилишди”, — деди француз ҳимоячи.
Маълумот учун, Ҳанси Флик шогирдлари 2-турдан сўнг 3 очко билан жадвалда 16-ўринни эгаллаб турибди. Энди “Барселона” учун кейинги турдаги беллашув ҳал қилувчи аҳамият касб этиши мумкин. ПСЖ эса ғалабадан кейин ўзининг юқори мақсадлари йўлида муҳим қадам ташлади.
“Zamin”ни Telegram'да ўқинг!
