Ўзбекистон футбол ассоциацияси (ЎФА) 2006 йилги «Олтин тўп» соҳиби, ЖЧ–2006 чемпиони ва Хитой термаси собиқ устози Фабио Каннаваро билан расмий шартнома имзоланганини маълум қилди. Италиялик мутахассис эндиликда миллий жамоамизни АҚШ, Канада ва Мексика майдонларида бўлиб ўтадиган жаҳон чемпионатига тайёрлайди.
ЎФА баёнотида таъкидланишича, Каннаваро — яқин ўтмишнинг энг нуфузли ҳимоячиларидан бири, мартаба ва тажрибаси бўйича терма жамоани катта мусобақага олиб киришга қодир мутахассис. Унинг иш услуби — интизом, ҳимояда компактлик ва тезкор ўтишлар — жамоанинг халқаро майдондаги рақобатбардошлигини оширишга қаратилган.
Янги бош мураббийга қуйидаги мутахассислар кўмаклашади:
— Эугенио Альбарелла — ёрдамчи мураббий (Япония термаси, «Ювентус», «Удинезе», «Динамо Загреб»да иш тажрибаси);
— Чиччо Троизе Франсеско — жисмоний тайёргарлик бўйича мураббий («Беневенто», «Удинезе», «Динамо Загреб»);
— Антонио Кименти — дарвозабонлар мураббийи (Италия ёшлар термаси, «Сампдория», «СПАЛ»).
Каннаваро штабининг шаклланиши билан иш режаси, йиғинлар формати ва ўртоқлик учрашувлари бўйича қўшимча маълумотлар босқичма-босқич эълон қилинади. Терма жамоа учун энг муҳим мақсад — жаҳон чемпионати олдидан ўйин тизимини мукаммаллаштириш, рақобатли таркибни шакллантириш ва барқарор натижани таъминлаш.
Мухлислар диққати марказида бўладиган янги босқич бошланди: миллий жамоа энди Каннаваро раҳбарлигида катта турнирга тайёргарликни жадаллаштиради. ЎФА барча янгиликларни расмий майдонларида тезкор равишда маълум қилиб боради.
“Zamin”ни Telegram'да ўқинг!
