Англия футболи афсоналаридан Уэйн Руни Премьер-лиганинг амалдаги чемпиони “Ливерпуль” сардорларидан бири Муҳаммад Салоҳни кескин танқид қилди. Унинг таъкидлашича, мисрлик юлдуз жамоа иши юришган пайтда гол уриб, ғалабани катта шоду-хуррамлик билан нишонлайди, аммо охирги ҳафталарда у майдонда ўзини тўлиқ сафарбар этаётганига шубҳа туғилган.
Рунига кўра, Салоҳнинг ҳимояга доим кўмак бермаслиги аллақачон маълум. Бироқ “Челси”га қарши ўйинда у чап қанотдаги жамоадоши қийналаётганини кўра туриб, вазиятни фақат томоша қилган. “Бу мени жиддий хавотирга солди”, деди собиқ ҳужумчи.
Мутахассис шунингдек, жамоа етакчилари Виржил ван Дейк ва Алисон Бекер Салоҳга очиқ айтиши кераклигини таъкидлади: “Сен ҳам орқа чизиққа ёрдам бер”. Рунининг фикрича, чемпионлар сўнгги турларда ўз ўйин услубини йўқотиб қўйгандек кўринади ва бу ҳолатни зудлик билан барқарорлаштириш зарур.
Салоҳ янги мавсумда барча турнирларда 10 та учрашув ўтказиб, 3 тадан гол ва ассист қайд этди. Шунга қарамай, Рунининг айтишича, “Ливерпуль” қайтадан ўзига хос юқори суръатга чиқиши учун етакчи футболчилар майдоннинг ҳар бир қаричида масъулиятни бўлишиши, иштиёқ ва интизомни бирдек намоён қилиши шарт. Мухлислар эсa Салоҳдан яна ўша ҳал қилувчи фаолликни кутиб қолишмоқда.
“Zamin”ни Telegram'да ўқинг!
