Англия термаси Уэлсга қарши ўртоқлик баҳсида 3:0 ҳисобида ишончли ғалаба қайд этар экан, «Эвертон» посбони Жордан Пикфорд яна бир тарихий маррани забт этди. 31 ёшли дарвоза қўриқчиси кетма-кет саккизта ўйинда дарвозасини соф сақлаб, Англия термаси тарихида бундай натижага эришган илк киперга айланди.
Пикфорднинг «қуруқ» серияси бир йилдан буён узилмаган: у миллий жамоа сафида охирги марта 2024 йил 10 октябр куни Грецияга қарши баҳсда (1:2) тўп ўтказган эди. Шундан бери ҳар бир чақириқда у ишонч, собитқадамлик ва тайёргарлик даражаси билан ажралиб, ҳимоя чизиғига осойишталик бахш этмоқда.
Бу рекорд Жорданнинг нафaқат реакцияси ва позицион танлови, балки ўйинни бошлашдаги аниқ узатмалари, жарима майдонидаги етакчилик фазилати билан таъминланганини кўрсатади. Унинг баланд имкониятлари Англия ҳимоясининг барқарорлигига қўшимча куч бўлди, ҳужумчилар эсa эркин ҳаракат қилишга имкон топди.
Маълумки, Пикфорд Англия билан икки бор Евро финалигача етиб борган, 2018 йилги жаҳон чемпионатида эса яримфинал босқичини кўрган. Энди эса рекорд даражадаги «нол»лар серияси унинг миллий жамоадаги меросида яна бир ёрқин саҳифа бўлиб қолмоқда.
Қисқаси, Уэлс устидан катта ҳисобдаги ғалаба — натижа, Пикфорднинг «дарвозани қулфлаган» ўйини — ишонч. Олдиндаги синовларда ҳам ушбу руҳ ва барқарорликни сақлаб қолиш энг муҳим вазифа бўлиб турибди.
“Zamin”ни Telegram'да ўқинг!
