“Манчестер Сити” клубининг асосий ҳужумчиси ва тўпурари Эрлинг Холанд Англия Премьер-лигасида жаҳон даражасидаги маҳоратини намойиш этишдан олдин Австрия ҳамда Германия чемпионатларида ўз истеъдодини кўрсатган.
25 ёшли норвегиялик юлдуз ҳозирда “шаҳарликлар” билан 2034 йилнинг ўрталаригача мўлжалланган шартномага эга. Бироқ Европанинг етакчи ОАВлари ёзганидек, унинг кейинги манзили Испания бўлиши эҳтимоли тобора кучаймоқда.
Сўнгги маълумотларга кўра, “Барселона” раҳбарияти ўзининг азалий рақиби — “Реал Мадрид” билан тенг даражада курашиш учун жамоага айнан Эрлинг Холандни олиб келиш режасини ишлаб чиқмоқда. Каталония клуби бу трансферни жамоанинг янги “қуёш”и сифатида кўрмоқда.
Бироқ бу сафар “Реал” ҳам бекор турибди, дейиш қийин. Transfer News Live, El Larguero ва Cadena SER манбаларининг ёзишича, мадридликлар ҳам ҳужум чизиғини кучайтириш учун Холандни олиш ниятида.
Маълумотларга қараганда, клуб президенти Флорентино Перес бир неча йиллардан бери Мбаппе ва Холанддан иборат “супержуфтлик”ни яратиш ғоясини кўнглида сақлаб келмоқда. Энди эса у бу режани амалга ошириш учун қайта фаол ҳаракат бошлаган.
Айниқса, Винисиус Жуниорнинг келажаги бор-ёғи бир неча ҳафта ичида савол остида қолган бир пайтда, бу режа янада долзарб тус олди. Манбаларнинг таъкидлашича, клуб раҳбарияти бразилиялик вингерни эҳтимолий сотув ҳақида огоҳлантирган ва бу йўл билан Эрлинг Холандни олиб келиш имконини яратишни кўзламоқда.
“Transfermarkt” экспертларининг баҳолашича, норвегиялик ҳужумчи ҳозирги кунда 180 миллион евро атрофида баҳоланмоқда. Агар “Реал” Винисиусни сотишга қарор қилса, бу маблағни тўлаш мадридликлар учун жиддий муаммо туғдирмайди.
Эрлинг Холанднинг трансфери футбол оламида катта шов-шув келтириши кутилмоқда. Унинг Испания чемпионатига йўл олиши нафақат “Реал” ва “Барселона” ўртасидаги рақобатни янада қизитади, балки бутун Европа футболида янги даврни бошлаб бериши мумкин.
Ҳозирча “Манчестер Сити” вакиллари бу борада расмий изоҳ бермаган. Бироқ футбол экспертларига кўра, агар бу трансфер амалга ошса, Эрлинг Холанднинг Мадриддаги дебюти йилнинг энг ёдда қоларли воқеаси бўлади.
