Каннаваро Уругвайга қарши баҳс учун янги таркиб танлади

Ўзбекистон миллий жамоаси бугун тунда Уругвай терма жамоасига қарши баҳсда иштирок этиш учун Малайзияга жўнаб кетади. Бу ҳақда жамоа бош мураббийи Фабио Каннаваронинг қароридан сўнг маълум бўлди.

Италиялик мутахассис мазкур ўйин учун янги таркибни шакллантирди. У Кувайтга қарши йиғинда иштирок этган айрим футболчиларга дам беришни маъқул кўрди ва ўрнига бир қатор янги номзодларни жалб этди.

Маълумотларга кўра, Фарруҳ Сайфиев (“Нефтчи”), Одилжон Ҳамробеков (“Трактор”, Эрон) ва Кувайтга қарши баҳсда қатнашган Аббосбек Файзуллаев (“Истанбул Башакшехир”, Туркия) жароҳат туфайли бу сафар жамоа сафига киритилмади. Шунингдек, Муҳаммадрасул Абдумажидов (“Пахтакор”), Умарали Раҳмоналиев (“Сабаҳ”, Озарбайжон), Нодир Абдураззоқов (ОКМК), Анвар Ҳожимирзаев (“Динамо”) ва Рустам Турдимуродов (“Сурхон”) ҳам мураббийлар қарорига кўра қайдномадан чиқарилди.

Янги чақирилган футболчилар орасида “Навбаҳор” ҳужумчиси Руслан Жиянов ва “Насаф” форварди Ҳусайн Норчаев бор. Улар илк бор Фабио Каннаваро қўл остида асосий таркибда синовдан ўтиш имконига эга бўлади.

Мураббий эълон қилган янгиланган таркиб қуйидагича:

Дарвозабонлар: Абдувоҳид Неъматов (“Насаф”), Ботирали Эргашев (“Нефтчи”), Владимир Назаров (“Пахтакор”)
Ҳимоячилар: Рустам Ашурматов (“Истиқлол”, Эрон), Шерзод Насруллаев (“Насаф”), Муҳаммадқодир Ҳамралиев, Ҳожиакбар Алижонов ва Дилшод Саитов (ҳаммаси “Пахтакор”), Алибек Давронов ва Умар Эшмуродов (“Насаф”), Жаҳонгир Ўрозов (“Динамо”)
Ярим ҳимоячилар: Акмал Мозговой (“Банияс”, БАА), Абдурауф Бўриев (“Пахтакор”), Азизжон Ғаниев (“Ал Батаэҳ”, БАА), Ҳожимат Эркинов (“Пахтакор”), Отабек Шукуров (“Банияс”, БАА), Жамшид Искандеров (“Нефтчи”), Азиз Турғунбоев (“Пахтакор”), Остон Ўрунов (“Персеполис”, Эрон), Руслан Жиянов (“Навбаҳор”)
Ҳужумчилар: Ҳусайн Норчаев (“Насаф”), Элдор Шомуродов (“Истанбул Башакшехир”, Туркия), Игорь Сергеев (“Пахтакор”).

Эслатиб ўтамиз, Ўзбекистон терма жамоасининг Уругвайга қарши назорат баҳси 13 октябрь куни Малакка шаҳридаги “Ҳанг Жебат” стадионида бўлиб ўтади. Учрашув Тошкент вақти билан соат 17:45 да бошланади.

Мазкур ўйин Каннаваро бошчилигидаги жамоа учун муҳим синов бўлиши кутилмоқда. Мураббий терма жамоа тактикаси ва янги футболчиларнинг уйғунлигини баҳолаш имконига эга бўлади.

Ўзбекистон термаси учун бу учрашув нафақат халқаро тажриба тўплаш, балки янги ғалаба руҳини шакллантириш имконияти ҳам бўлади.

Шухрат Раззаков

«ZAMIN.UZ» муҳаррири