Мадриднинг “Реал” клуби ҳужумчиси Килиан Мбаппе яқинда берган интервьюсида ўзини футболчи сифатида шакллантирган асосий илҳом манбасини тилга олди. Франциялик юлдузнинг айтишича, у учун футболдаги энг катта намуна — португалиялик афсона Криштиану Роналду.
«Криштиану Роналду мен учун ҳар доим ибрат бўлган. У нафақат майдондаги ютуқлари, балки интизоми ва меҳнатсеварлиги билан ҳам ажралиб туради. У билан мулоқот қилиш, маслаҳат олиш — мен учун катта шараф. У менга доим қўллаб-қувватлов ва ишонч берган», — деди Мбаппе.
Франциялик ҳужумчи Роналдунинг “Реал”да қолдирган изини ҳам алоҳида эътироф этди:
«Роналду — “Реал”нинг юзи, клуб тарихидаги энг катта рамз. У кетганига анча бўлса ҳам, Мадридда ҳамон унинг номи билан фахрланишади. Одамлар уни эслайди, у ҳақда суҳбатлар тинмайди».
Маълумки, Криштиану Роналду 2009 йилдан 2018 йилгача “Реал” сафида тўп сурган ва клуб тарихидаги энг самарали футболчига айланган — 438 та учрашувда 450 гол. Шу даврда у “қироллик клуби” билан 4 марта “Олтин тўп”ни қўлга киритган.
Ҳозирда 40 ёшли Роналду Саудиянинг “Ан Наср” жамоаси шарафини ҳимоя қилмоқда ва ҳануз юқори даражада ўйин кўрсатмоқда. Мбаппенинг сўзларига кўра, у Роналдунинг меҳнатга бўлган муҳаббати ва рақобатдаги иродасидан ҳамон илҳом олади.
«Мен учун у доим энг яхши бўлиб қолади. Агар сен футболчи бўлсанг — Криштианудан ниманидир ўрганмасдан иложинг йўқ», — дея хулоса қилди Мбаппе.
“Zamin”ни Telegram'да ўқинг!
