Германия терма жамоасининг собиқ аъзоси Илкай Гюндоган “Ливерпуль”нинг ёш ярим ҳимоячиси Флориан Вирц атрофидаги баҳсларга изоҳ берди. Унинг фикрича, 22 ёшли немис футболчисига бўлган танқидлар адолатсиз ва ортиқча бўлиб, бу фақат унинг трансфери қиммат бўлгани билан боғлиқ.
Гюндоган “Transfer Sector” нашрига берган интервьюсида Вирцни ҳимоя қилиб, унинг ўйини статистикадан кўра чуқурроқ таҳлил қилиниши кераклигини таъкидлади.
“Флориан айбдор эмас. Унинг трансфери 125 миллион евро туради, шу сабаб одамлар ундан фавқулодда натижа кутади. Лекин мен маълумотларга кўз югуртирдим — Премьер-лигада ҳеч бир ўйинчи Вирцдек даражада голли вазиятлар яратмаган. Футбол фақат гол ёки ассист билан баҳоланмайди, бу ўйинда чуқур таҳлил талаб этилади”, — деди Илкай.
Унинг сўзларига кўра, Вирц ҳозирги босқичда мослашув даврини бошдан кечирмоқда ва унинг ҳақиқий салоҳияти ҳали тўлиқ очилмаган. “Кимдир унинг ўйинини қадрламаса, демак у футболни умуман тушунмайди. Мен ишонаман, яқин ойларда Вирц ҳақиқий даражасини кўрсатади”, — деб қўшимча қилди Гюндоган.
Маълумот учун, Флориан Вирц жорий мавсумда “Ливерпуль” таркибида 10 та ўйинда майдонга тушиб, ҳозирча фақат битта голли узатма қайд этган.
Таҳлилчилар фикрича, ёш футболчидан катта интизом ва босим остидаги ўйинларда барқарорлик кутилмоқда. Шунинг учун ҳам Гюндоганнинг қўллаб-қувватлови Вирц учун катта маънавий туртки бўлиши мумкин.
Шундай қилиб, Илкай Гюндоганнинг сўзлари яна бир бор ёш футболчига ишонч билдириш ва унинг ҳақиқий қобилиятини вақт орқали намоён этиш кераклигини кўрсатди.
“Zamin”ни Telegram'да ўқинг!
