Токиодаги “Адзиномото” стадионида ўтган ёрқин ўртоқлик учрашуви футбол мухлисларини ҳайратга солди — Япония миллий терма жамоаси Бразилия устидан иродали ғалабани қўлга киритди. Беллашув голларга бой бўлиб, 3:2 ҳисобида якунланди.
Ўйиннинг илк қисмида бразилияликлар устунликни қўлга олди. 26-дақиқада Пауло Энрике ҳисобни очди, ортидан эса Габриэл Мартинелли 32-дақиқада иккинчи голни киритиб, ҳисобни 2:0 қилди. Шу пайтда кўпчилик бразилияликлардан навбатдаги осон ғалабани кутганди.
Бироқ иккинчи бўлимда майдонда мутлақо бошқа манзара намоён бўлди. Японлар ўзини йўқотмади ва жамоавий руҳ билан ўйинни тубдан ўзгартиришга киришди. 52-дақиқада сардор Такуми Минамино ҳисобни қисқартирди, ундан 10 дақиқа ўтиб Кейто Накамура таъсирли зарба билан ҳисобни 2:2 қилди.
Шиддат авжида кетар экан, 71-дақиқага келиб “Фейеноорд” ҳужумчиси Аясэ Уэда ҳал қилувчи голни урди — натижа 3:2! Бу зарба Япония учун нафақат ғалабани, балки катта спорт ифтихорини ҳам олиб келди.
Тўлиқ ҳисоб:
Япония – Бразилия 3:2
Голлар: Такуми Минамино (52'), Кейто Накамура (62'), Аясэ Уэда (71') — Пауло Энрике (26'), Габриэл Мартинелли (32').
Эслатиб ўтамиз, Бразилия уч кун олдин Жанубий Кореяга қарши баҳсда 5:0 ҳисобида йирик ғалаба қозонганди. Япония эса Парагвай билан 2:2 ҳисобида дуранг қайд этганди.
Бу сафар эса Токио осмони остида тарихий натижа қайд этилди — Самурайлар футболнинг йирик жамоаси устидан курашиб, ҳақли ғалаба қозонишди. Улар нафақат натижа, балки ирода ва жамоавий уйғунлик билан ҳам бутун дунё мухлисларини лол қолдиришди.
“Zamin”ни Telegram'да ўқинг!
