Бразилиянинг машҳур “Сантос” клуби ҳужумчиси Неймар яна Европага қайтишга тайёрланмоқда. ESPN телеканали Фабрицио Романо маълумотларига таяниб хабар беришича, унга А Сериянинг етакчи клублари — “Интер” ва “Наполи” жиддий қизиқиш билдирмоқда.
Манбаларга кўра, 33 ёшли футболчининг “Сантос” билан амалдаги шартномаси жорий йилнинг 31 декабрида якунланади. Шу боис, Неймар қишки трансфер ойнасидан сўнг Европадаги янги жамоа сафида фаолиятини давом эттириш имконини кўриб чиқмоқда.
Маълумотларга кўра, тажрибали ҳужумчи Бразилия терма жамоаси бош мураббийи Карло Анчелоттининг эътиборини қозонишни ва 2026 йилги жаҳон чемпионатида миллий жамоа сафида иштирок этиш имконига эга бўлишни мақсад қилган.
Таъкидланишича, ўтган ёзда Неймарга “Милан” клубидан ҳам таклиф бўлган, аммо у ўшанда Бразилияда қолишни маъқул кўрганди. Энди эса у Европага қайтиб, юқори даражадаги чемпионатда яна бир бор ўз салоҳиятини намоён этиш ниятида.
Футбол таҳлилчиларига кўра, Неймарнинг А Серияга қайтиши италиялик клублар учун катта маркетинг ютуғи бўлиши мумкин. Шу билан бирга, у Европа саҳнасидаги сўнгги мавсумларидан бирини ёрқин тарзда ўтказиш имконига ҳам эга бўлади.
Шундай қилиб, Неймарнинг келгуси манзили борасида аниқ қарор ҳали қабул қилинмаган бўлса-да, Италия клублари унинг трансфери учун жиддий кураш бошлагани айтилмоқда.
“Zamin”ни Telegram'да ўқинг!
