Forbes журнали 2025 йилнинг энг кўп даромад топган футболчилари рўйхатини эълон қилди. Ҳар йили ўтказиладиган ушбу рейтингда футболчиларнинг майдондаги маоши ва тижорат шартномаларидан келадиган даромадлар ҳисобга олинади.
Рейтингнинг биринчи поғонасини яна бир бор португалиялик юлдуз Криштиану Роналду эгаллади. Унинг Саудиянинг “Ан Наср” клубидаги йиллик маоши 230 миллион долларга тенг. Шу билан бирга, Nike, Binance ва Herbalife каби йирик брендлар билан тузилган ҳомийлик шартномалари орқали футболчи яна 50 миллион доллар ишлаган.
Шундай қилиб, Роналдунинг умумий йиллик даромади 280 миллион долларни ташкил этди. Бу натижа унга яна бир бор Forbes рўйхатининг шоҳ саҳифасини эгаллаш имконини берди.
Иккинчи ўринга 130 миллион доллар билан “Интер Майами”да фаолият юритаётган Лионел Месси жойлашди. Унинг 60 миллиони майдондаги маошидан, қолган 70 миллиони эса тижорат шартномалари орқали келади.
Учинчи ўринни Саудиянинг “Ал Иттиҳод” жамоаси сафида ўйнаётган Карим Бензема эгаллади — 104 миллион доллар. Франциялик ҳужумчи асосий даромадини клуб маошидан топмоқда.
Тўртинчи поғонада “Реал Мадрид”нинг янги юлдузи Килиан Мбаппе жой олган. Унинг йиллик даромади 95 миллион долларни ташкил этади.
Бешинчи ўринда “Манчестер Сити” форварди Эрлинг Ҳоланд — 80 миллион доллар билан қайд этилган.
Қолганлар қуйидагича тақсимланган:
6. Винисиус Жуниор (“Реал”) — 60 (40+20) млн доллар
7. Муҳаммад Салоҳ (“Ливерпул”) — 55 (35+20) млн доллар
8. Садио Мане (“Ан Наср”) — 54 (50+4) млн доллар
9. Жуд Беллингҳем (“Реал”) — 44 (29+15) млн доллар
10. Ламин Ямал (“Барселона”) — 43 (33+10) млн доллар
Мутахассислар таъкидлашича, Саудия Арабистонидаги янги молиявий сиёсат ва катта шартномалар футболчиларнинг умумий даромад манбаларида муҳим ўрин тутмоқда. Шу билан бирга, ёш авлод вакиллари — Беллингҳем ҳамда Ямалнинг рўйхатдаги иштироки янги авлод юлдузларининг молиявий ўсишини кўрсатмоқда.
Forbes таҳлилчилари фикрича, 2025 йил футболида тижорат соҳаси билан боғлиқ келишувлар спорт майдонидаги натижалар каби муҳим аҳамият касб эта бошлаган. Роналду ва Месси ҳануз пул ишлаш борасида рақибсиз бўлиб турибди, аммо Мбаппе ва Ҳоланд каби ёш юлдузлар уларга жиддий рақобат қила бошлаган.
Рейтинг нафақат футболчиларнинг молиявий қудратини, балки уларнинг бренд сифатидаги таъсирини ҳам намоён этади. Роналдунинг доимий етакчилиги эса унинг маркетинг жиҳатдан дунёдаги энг катта спорт рамзларидан бири эканини яна бир бор исботлади.
“Zamin”ни Telegram'да ўқинг!
