"Фенербахче" клубининг янги президенти Садеттин Саран жамоанинг собиқ бош мураббийи Жозе Моуринью фаолияти ҳақида очиқча гапирди. Унинг таъкидлашича, португалиялик мутахассис клубни оғир ҳолатда қолдирган.
“Ўтмиш ҳақида кўп гапиришни хоҳламайман, аммо ёзги тайёргарлик жараёни шунчалик ёмон ўтганидан афсусдаман. Португалияда жамоа бир кунда фақат бир марта машғулот ўтказарди — шунинг ўзи етарли далил”, — деди Саран журналистлар билан суҳбатда.
Президент сўзларига кўра, янги футболчилар жамоага қўшилганида Моуринью ҳали лавозимда бўлган, аммо беш ҳафта ўтгач, клубни тарк этган. “Унинг кетиши сабабли мавсумолди тайёргарлигимиз издан чиқди. Бунинг оқибати ҳали ҳам сезилмоқда”, — дея қўшимча қилди у.
Саран шунингдек, Моуриньюдан кейин клубда муҳит мутлақ сўнганини айтди. “Ўша пайтда “Фенербахче”да ҳаёт ўлгандек эди — буни юмшоқ сўз билан айтяпман. Қароргоҳга келганимда барчасини ўз кўзим билан кўрдим”, — деди у.
Президентнинг бу сўзлари мухлислар орасида катта муҳокамаларга сабаб бўлди. Айримлар унинг фикрини қўллаб-қувватласа, бошқалар Моуриньюнинг қисқа муддатда ҳам жамоага таъсир кўрсатганини таъкидламоқда.
Сараннинг таъкидлашича, ҳозир “Фенербахче”да янги бошланиш даври кетмоқда. Жамоа қайтадан руҳий бирдамликни тиклаб, янги мавсумга жиддий тайёргарлик кўраётганини уқтирди. “Бизда энди ўзгартириш вақти келди — “Фенербахче” яна жонланади”, — деди клуб раҳбари ишонч билан.
“Zamin”ни Telegram'да ўқинг!
