ФИФАнинг 17 октябрь куни эълон қилинган янгиланган рейтингида Ўзбекистон миллий жамоаси бир поғона пастлаб, 55-ўринга тушди. Осиё қитъаси жамоалари орасида эса Ўзбекистон ҳозирча 6-ўринни сақлаб турибди.
Янгиланган кўрсаткичларга кўра, Япония 1645,34 очко билан 19-ўринни сақлаб қолган. Ундан кейинги ўринларда Эрон (21-ўрин, 1618,28 очко), Корея Республикаси (22-ўрин, 1593,92 очко), Австралия (25-ўрин, 1584,02 очко) ва Қатар (52-ўрин, 1461,6 очко) жой олган.
Ўзбекистон терма жамоасининг жорий очколари 1452,34 бўлиб, ўтган рейтингга нисбатан 0,97 баллга камайган. Бу натижа “оқ-қизиллар”ни бир поғона пастга туширди.
Шу билан бирга, умумжаҳон рейтингининг юқори қисмида ҳам ўзгариш кузатилди: Испания терма жамоаси 2014 йилдан бери илк бор дунёдаги етакчи ўринга чиқди. Аргентина Францияни ортда қолдириб, иккинчи поғонага кўтарилди.
Мутахассислар таъкидлашича, Ўзбекистон жамоаси учун кейинги ўйинлардаги натижалар катта аҳамиятга эга — улар жаҳон рейтингида юқорилаш имконини қайта қўлга киритиш учун ҳал қилувчи бўлади.
“Zamin”ни Telegram'да ўқинг!
