Туркия Суперлигасидаги “Истанбул Башакшеҳир” жамоаси сўнгги ҳафталарда нафақат майдондаги ўйини, балки ижтимоий тармоқлардаги фаоллиги билан ҳам бутун футбол дунёси диққат марказида турибди. Бунда жамоа сафида тўп суриб келаётган ўзбекистонлик юлдузлар — Элдор Шомуродов ва Аббосбек Файзуллаевнинг ҳиссаси ҳам катта.
Ўзбекистондаги кўплаб футбол ишқибозлари бу мавсумда айнан “Башакшеҳир”га мухлислик қила бошлади. Сабаби оддий — бу клубда миллий терма жамоамизнинг икки етакчиси бир вақтнинг ўзида ўйнаяпти.
Яқинда “Башакшеҳир” жамоаси жаҳон юлдузи Килиан Мбаппе билан боғлиқ креатив видеоролик орқали интернетни “портлатди”. Клуб сунъий интеллект ёрдамида Мбаппе “Башакшеҳир”нинг ижтимоий тармоқдаги саҳифасини кузатиб бораётгандек видеомонтаж қилди. Унда франциялик юлдуз “Бу жамоанинг контенти жуда ёқимли”, дея фикр билдиргани акс этган.
Шундан сўнг “Башакшеҳир” француз тилида “Continue à nous suivre Kylian!” — яъни “Килиан, бизни кузатишда давом эт!” деган жавоб билан пост қўйди. Энг қизиғи, бу пост Мбаппенинг ўзигача етиб борди ва у расман “лайк” босди.
Франция юлдузининг бундай ҳаракати “Башакшеҳир”га жаҳон миқёсида катта PR олиб келди. Турк ва халқаро ОАВ бу воқеани қизиқиш билан ёритмоқда.
Шомуродов эса клубда ўз сўзини айтди. Ўзбекистон терма жамоасининг тўпурари бўлган Элдор ёзги трансфер вақтида “Рома”дан 3 миллион еврога ижарага олинганди. Унинг тўлиқ трансфери учун “Башакшеҳир” 2,7 миллион евро тўлай олади. Элдор қисқа вақт ичида жамоанинг етакчиси ва асосий тўпурарига айланди — у 7 учрашувда 3 та гол уриб, битта ассист амалга оширди.
30 ёшли ҳужумчи халқаро майдонда ҳам самарали ўйин кўрсатиб келмоқда: миллий жамоа сафида 86 ўйинда 43 та гол уриш — бу унинг катта тажрибасидан далолат.
Шунингдек, “Башакшеҳир” ёзда Россия ЦСКАсидан Аббосбек Файзуллаевни 7,5 миллион еврога сотиб олди. Бу трансфер орқали Аббос жамоа тарихидаги энг қиммат футболчига айланди.
22 ёшли ҳужумкор яримҳимоячи ҳозирча бешта ўйинда майдонга тушиб, янги чемпионат муҳитига мослашмоқда. Аббос миллий жамоа сафида 30 марта ўйнаб, 8 та гол урган.
Шомуродов ва Файзуллаевнинг “Башакшеҳир”даги иштироки турк клубига нафақат майдонда, балки оммавий майдонда ҳам катта ютуқ келтирмоқда. Улар иккиси ҳам нафақат ўзбек футболи, балки турк Суперлигаси учун ҳам янги юзга айланиб бормоқда.
“Башакшеҳир”нинг янги саҳифаси бошланди — унда Элдор ва Аббоснинг номи илҳом, Мбаппенинг “лайки” эса қўшимча реклама бўлди.
“Zamin”ни Telegram'да ўқинг!
