Англия премьер-лигасида навбатдаги мураббий алмашинув рўй берди. “Ноттингем Форест” расмий равишда бош мураббий Ангелос Постекоглу билан ҳамкорликни тугатганини маълум қилди. Бу ҳақда клуб ўзининг X (Twitter) саҳифасида эълон қилган.
Австралиялик мутахассис жамоани бор-йўғи бир ой олдин — сентябрь ойида қабул қилиб олганди. Аммо у даврда жамоа натижаларини яхшилай олмади. Постекоглу раҳбарлигида “ўрмончилар” барча мусобақаларда 8 та ўйин ўтказди — шулардан 6 тасида мағлубият, иккитасида эса дуранг қайд этилди.
АПЛ жадвалида вазият ҳам мураккаб. “Ноттингем Форест” 8 турдан сўнг атиги 5 очко тўплаб, 17-ўринда турибди. Жамоа аутсайдерлар зонасидан фақат бир очко узоқда, бу эса раҳбарият учун жиддий хавотирга сабаб бўлди.
Бугун бўлиб ўтган баҳсда ҳам “ўрмончилар” “Челси”га қарши майдонда 0:3 ҳисобида мағлубиятга учради. Бу натижа Постекоглу тақдирини ҳал қилувчи бўлди, дейиш мумкин.
Маҳаллий матбуот маълумотларига кўра, клуб раҳбарияти яқин кунларда янги мураббийни тайинлашни режалаштирмоқда. Бир неча номзодлар орасида инглиз мутахассиси Грэм Поттер ва португалиялик Рубен Аморим номлари тилга олинмоқда.
“Ноттингем Форест” тарихан Англия футболида катта ном саналади, аммо сўнгги йилларда жамоа қайта тикланиш босқичида. Мухлислар эса навбатдаги мураббий жамоага барқарорлик ва натижа олиб келишига умид қилмоқда.
“Zamin”ни Telegram'да ўқинг!
