Италия футболида навбатдаги шок воқеа содир бўлди. Б Серияда иштирок этаётган «Юве Стабиа» клуби мафия билан боғлиқликда айбланиб, Италия мафияга қарши прокуратураси томонидан мусодара қилинди. Тергов натижаларига кўра, жамоа раҳбарияти «Каморра»нинг икки машҳур клан — Д’Алесандро ва Импарато гуруҳлари билан яқин алоқада бўлган. Шу боис, клуб фаолияти суд назорати остига олинди.
Бу Италия футболи тарихида учинчи, аммо энг оғир ва кескин ҳолат сифатида қайд этилмоқда. Илгари шундай ҳолатлар «Фоджа» ва «Кротоне» жамоаларида ҳам содир бўлганди, аммо бу галги ҳолатнинг кўлами ва таъсири анча катта.
Тергов хулосаларига кўра, мафия клуб ҳаётининг деярли барча жабҳасига аралашган — хавфсизлик тизими, чипта сотуви, сафарлар ва ҳатто овқатланиш жараёнларигача назорат қилган. Прокуратура маълумотларига кўра, стадион хавфсизлигини ҳам Импарато кланининг одамларидан бири бошқарган. Шу билан бирга, айрим клан аъзолари сохта исмлар билан ўйинларга кириб, бепул чипталар орқали трибуналарда жой олган.
Миллий мафияга қарши прокурор Жованни Мелилло «Юве Стабиа»ни “Каморрага тўлиқ бўйсунадиган тузилма” деб атади. Унинг сўзларига кўра, клуб фаолиятидаги қарорлар мафиявий тармоқ томонидан қабул қилинган:
— Футболчилар фақат ўйнашарди, қолган барча нарсани Каморра ҳал қиларди, — деди прокурор.
Бу фош этилган тизимнинг қанчалик чуқур илдиз отганини кўрсатди. Тергов маълумотларига кўра, ўтган мавсумда 38 нафар мухлисга стадионга кириш тақиқланган бўлса-да, уларнинг ярмидан кўпи клан билан боғлиқ бўлиб, ички ёрдам орқали тақиқни айланиб ўтган.
Айнан шу сабабли, прокурорлар клубни “тўлиқ мафиявий назоратдаги ташкилот” сифатида баҳолаган. Бу ҳолат Италия футболи обрўсига катта зарба берди.
Италия футбол федерацияси ҳозирда вазиятни чуқур ўрганмоқда. Жумладан, 29 октябр куни бўлиб ўтиши керак бўлган “Бари”га қарши баҳсни ҳам бекор қилиш масаласи кўриб чиқилаётгани маълум қилинди.
Қизиғи шундаки, жамоа яқинда “Авеллино”ни 2:0 ҳисобида мағлуб этиб, турнир жадвалида еттинчи ўринга кўтарилган эди. Ҳатто А Серига чиқиш ҳақидаги орзулар ҳам ҳақиқатга яқин кўринарди. Бироқ мафияга оид айбловлардан сўнг бу орзулар бир зумда йўқ бўлиб кетди.
Маълумот учун, 2025 йил июнь ойида “Юве Стабиа” клуби ирландиялик “Брера Холдингс” инвестиция компанияси томонидан 52 фоиз улуш билан сотиб олинганди. Аммо терговчиларга кўра, янги эгалари клубдаги илгаридан мавжуд мафиявий занжирни узишга муваффақ бўлмаган ва коррупцион тизим амалда сақланиб қолган.
Италияда бу воқеа кенг жамоатчиликнинг катта муҳокамасига сабаб бўлди. Маҳаллий нашрлар ёзишича, “Юве Стабиа” атрофидаги инқироз фақат бир жамоанинг эмас, балки бутун италия футболидаги назорат ва шаффофлик тизимидаги муаммоларни яна бир бор очиб берди.
“Zamin”ни Telegram'да ўқинг!
