Франциялик юлдуз Килиан Мбаппе Мадриднинг «Реал» жамоасида сентябрь ойининг энг яхши футболчиси сифатида эътироф этилди. Бу ҳақда клубнинг расмий сайти маълум қилди.
«Яна ой футболчиси деб тан олиниш — бу ажойиб ҳис. Биз кўп ўйинларда зафар қучдик, кўп гол урдик. Жамоамизнинг ўйини ва натижалари билан мамнунман. Шу руҳда ҳаракатни давом эттирамиз, деган умиддаман», — деди Мбаппе клуб сайти орқали.
Қайд этиш керакки, 26 ёшли ҳужумчи бу мукофотни «Реал» сафида иккинчи ой кетма-кет қўлга киритмоқда. Ундан аввал у Чемпионлар лигасининг 2-турида ҳафтанинг энг яхши ўйинчиси ҳамда Ла Лиганинг сентябрь ойи футболчиси деб топилган эди.
Жорий мавсумда Мбаппе барча мусобақаларда 12 та ўйинда майдонга тушиб, 15 та гол муаллифига айланди ва 2 та голли узатма амалга оширди.
“Zamin”ни Telegram'да ўқинг!
