АПЛнинг 9-тури Лондонда «Ливерпул» учун яна бир нохуш кеча билан ёдда қолди. Арне Слот бошқарувидаги мерсисайдликлар сафарда «Брентфорд»га қарши баҳсда 2:3 ҳисобида мағлубиятга учради.
Бу натижа клуб тарихида камдан-кам кузатиладиган нохуш серияни давом эттирди — «қизиллар» пойтахтда кетма-кет бешинчи марта мағлуб бўлди. Илгари жамоа икки марта «Челси»га (1:2, 1:3) ҳамда бир мартадан «Кристал Пэлас» (1:2) ва «Фулҳэм» (2:3)га ютқазган эди.
Шу тариқа, Лондон сўнгги ойларда «Ливерпул» учун қийин ҳудудга айланди десак муболаға бўлмайди. Слот шогирдлари нафақат пойтахтда, балки умумий ҳисобда ҳам сўнгги тўрт ўйинда мағлуб бўлиб, чемпионатдаги ритмини йўқотиб қўйди.
"Брентфорд"га қарши кечган учрашувда «қизиллар»нинг айрим ҳужумлари хавфли бўлган бўлса-да, рақибнинг тезкор қарши ҳужумлари натижани ҳал қилди. Иккинчи бўлимда жамоа ҳисобни тенглаштириш имконини топган бўлса-да, ҳимоядаги хатолар яна ўз сўзини айтди.
Муҳим жиҳат шундаки, «Ливерпул» тарихида илк бор Лондонда шунча кетма-кет мағлубиятга учради. Мухлислар бу ҳолатни Арне Слотнинг тактик ёндашувига ва жамоанинг сўнгги ҳафталардаги руҳий ҳолатига боғламоқда.
Ҳозирда «Ливерпул» 15 очко билан турнир жадвалида 6-поғонада жойлашган. Чемпионлик пойгасида етакчилардан орқада қолмаслик учун жамоага навбатдаги турларда ғалабалар сериясини бошлаш зарур бўлади.
Слотнинг ўзи эса ўйиндан кейин шундай деди: «Биз жуда кўп имконият яратдик, лекин уларни голга айлантира олмадик. Ҳимоядаги диққатсизлик бизга яна қимматга тушди. Бу серияни тўхтатиш учун курашамиз».
“Zamin”ни Telegram'да ўқинг!
