«Аталанта» бош мураббийи Иван Юрич «Милан»га қарши ўйин олдидан матбуот анжуманида иштирок этди. Италия чемпионатининг тўққизинчи тури доирасидаги учрашув 28 октябрь куни кечқурун бўлиб ўтади.
Юрич сўнгги ўйинларда самарадорлик пастлиги ва бир қатор дуранг натижаларга қарамай, ижобий кайфиятда эканлигини билдирди. «Биз кўплаб имкониятлар яратдик, лекин уларни голга айлантира олмадик.
Жамоа яхши ҳолатда, Лукман тўлиқ сафда, унга фақат гол уриш етмаяпти. Хар 2-3 кунда ўйнаш қийин, лекин биз ўз ҳолатимизни доимий таҳлил қилиб турибмиз.
«Милан»ни тўхтатиш учун бизга ритм ва мустаҳкамлик керак», - деди Юрич Football Italia нашрига берган интервьюсида.
Мураббий, шунингдек, дарвозабон Марко Карнесекки билан ҳеч қандай келишмовчилик йўқлигини, унга нисбатан айтилган сўзлар фақат ҳиссиётлар таъсири остида бўлганини таъкидлади.
«Милан» А Серия турнир жадвалида 17 очко билан учинчи ўринда бормоқда. «Аталанта» эса 12 очко билан еттинчи ўринда жойлашган.
