АПЛ ҳужумчиси тезлик оширганлиги учун жазоланди

"Борнмут" клуби ҳужумчиси Жастин Клюйверт ҳайдовчилик ҳуқуқидан маҳрум қилинди. The Sun нашрининг маълумотларига кўра, нидерландиялик футболчи тезликни оширганлик учун жазога тортилган.

Сўнгги уч ой ичида у икки марта бу қоидабузарликни содир этган. Англия Премьер-лигасининг жорий мавсумида 26 ёшли футболчи саккизта ўйинда майдонга тушиб, бир гол уришга муваффақ бўлган.

"Борнмут" жамоаси Англия чемпионатининг бу йилги мавсумининг биринчи ярмида муваффақиятли иштирок этмоқда. Тўққиз турдан сўнг "Олчалар" 18 очко тўплаб, турнир жадвалида иккинчи ўринни эгаллаб турибди.

Улар пешқадам "Арсенал"дан тўрт очкога ортда қоляпти.