Лондоннинг машҳур клуби “Арсенал” мухлисларини яна бир тарихий натижа билан қувонтирди. Микел Артета бошқарувидаги жамоа октябр ойини бирорта гол ўтказмасдан якунлаб, Англия футболи тарихида камдан-кам кузатилган рекордга эга чиқди.
Лига Кубоги 1/8 финалида “тўпчилар” “Брайтон” устидан 2:0 ҳисобида ғалаба қозониб, мусобақанинг кейинги босқичига йўл олди. Бу ғалаба нафақат жамоанинг навбатдаги зафари, балки октябр ойи учун муҳим статистик ютуқ ҳам бўлди — “Арсенал” ой давомидаги 6 та ўйиннинг бирортасида ҳам дарвозасидан тўп ўтказмади.
Англия юқори дивизионидаги ҳеч бир жамоа бу каби натижага эришмаган. Одатда, мавсумнинг ўрталаридаги жадал график ва турли мусобақалардаги юклама сабаб клублар барқарор ҳимояни сақлаб қололмайди. Бироқ “Арсенал” сўнгги олти ўйинда ҳам рақибларини голсиз қолдира олди.
Микел Артета шогирдлари нафақат ҳимояда ишончли, балки ҳужумда ҳам самарали ўйин кўрсатмоқда. Ой давомида жамоа барча мусобақаларда ғалаба қозонди — бу, ўз навбатида, жамоа руҳиятини янада кўтарди.
Эътиборга молик жиҳати — “Арсенал” сўнгги марта 28 сентябр куни гол ўтказган. Ўша пайтда АПЛ доирасида “Нюкасл” ҳужумчиси Ник Волтемаде “тўпчилар” дарвозасини ишғол этганди. Шундан бери 540 дақиқадан ортиқ вақт мобайнида лондонликлар дарвозаси дахлсиз сақланмоқда.
Мураббий Артета ўйиндан сўнг шогирдларининг интизом ва барқарорликни сақлашини юқори баҳолади. Унинг таъкидлашича, жамоа ҳимоядаги ҳаракатни жамоавий фалсафанинг асосий қисми сифатида кўради. «Бундай натижалар осон келмайди. Ҳар бир ўйинчи ўз вазифасини сидқидилдан бажармоқда, айнан шу сабаб биз рекордга эришдик», — деди у.
Шу тариқа, “Арсенал” октябр ойини мағлубиятсиз ва голсиз якунлаб, Англия футболида янги стандарт ўрнатди. Кўпчилик мутахассислар бу натижани Микел Артета олиб келган интизомли тизимнинг самараси деб баҳоламоқда. Энди жамоа ноябр ойида ҳам шу ритмни сақлаб қолиш ва чемпионлик пойгасида ўз мавқеини мустаҳкамлаш ниятида.
“Zamin”ни Telegram'да ўқинг!
