Жаҳон ММА ишқибозлари интизорлик билан кутган UFC 322 турнирига сана белгиланди. Катта воқеа 16 ноябрь куни АҚШнинг Ню-Йорк шаҳридаги машҳур Madison Square Garden аренасида бўлиб ўтади. Бу жанг кечаси йилнинг энг кутилган октагон воқеаларидан бири сифатида қаралмоқда.
Турнирнинг марказий жангидан катта қизиқиш кутилмоқда — ярим ўрта вазн тоифасидаги чемпионлик камари учун Ислом Маҳачев ва австралиялик рақиби Жек Делла Маддалена куч синашади. Ҳозирги UFCнинг энг барқарор ва техник жиҳатдан мукаммал жангчилари саналган бу икки спортчи ўртасидаги тўқнашув том маънода “жанг санъати сабоғи”га айланиши кутилмоқда.
Маҳачев учун бу жанг катта синов бўлади — у илк бор ярим ўрта вазнда камар ҳимоясини амалга оширади. Маддалена эса ўзининг жароҳатдан кейинги илк жангини ўтказмоқда ва реванш кайфиятида эканини таъкидлаган.
Турнирнинг иккинчи асосий жангида аёллар ўртасидаги ҳақиқий суперқаршилик кутилаётир: Валентина Шевченко ва Вэйли Жан ўрта енгил вазн тоифасидаги чемпионлик учун майдонга чиқишади. Бу икки жангчи ҳам ўз дивизионининг етакчилари бўлиб, жанг ММА тарихидаги энг қизиқ аёллар тўқнашувларидан бири сифатида ёдда қолиши мумкин.
Бошқа жанглар ҳам мухлисларни беэътибор қолдирмайди. Турнир доирасида қуйидаги жанглар ташкил этилган:
Леон Эдвардс (22–5) – Карлос Пратес (22–7);
Шон Брэди (18–1) – Майкл Моралес (18–0);
Бо Никал (7–1) – Родольфо Виейра (11–3);
Бенеил Дариуш (23–6–1) – Бенуа Сен-Дени (15–3, 1 NC);
Роман Копилов (14–4) – Грегори Родригес (17–6);
Байсангур Сусуркаев (10–0) – Эрик Макконико (10–3–1).
Турнирнинг дастлабки жанглари Тошкент вақти билан соат 04:00 да бошланади, асосий кард эса 08:00 да старт олади.
Маҳачев ва Маддаленанинг тўқнашуви нафақат UFC ярим ўрта вазнидаги қиролни аниқлайди, балки келгуси мавсумдаги чемпионлик интригаларига ҳам таъсир кўрсатиши мумкин. Шунингдек, Шевченко ва Жан ўртасидаги жанг аёллар ММАсидаги янги даврни бошлаб бериши мумкин.
UFC 322 турнири ҳар жиҳатдан катта воқеага айланиши тайин. Мутахассислар бу кечани “жангчиларнинг иродаси, техникаси ва тажрибаси тўқнашадиган кеча” деб таърифлашмоқда. ММА олами эса яна бир маротаба Madison Square Garden'нинг улкан саҳнасида нафасларини тийган ҳолда жангларни кузатади.
“Zamin”ни Telegram'да ўқинг!
