Футбол оламидаги икки буюк юлдуз — Криштиану Роналду ва Лионель Месси ўртасидаги рақобат 20 йилдан бери тўхтамайди. Улар ўртасидаги солиштиришлар, баҳслар ва фанатлар ўртасидаги мунозаралар бугун ҳам қизғин давом этмоқда.
Шу мавзуда Португалия терма жамоаси ва “Ан-Наср” ҳужумчиси Криштиану Роналду яқинда таниқли журналист Пирс Морганга интервью берди.
Суҳбат давомида журналист ундан “Кўпчилик Месси сендан яхшироқ дейди, бу фикр ҳақида нима дейсан?” деб сўради. Роналду бу саволга кескин жавоб қайтарди:
“Бу гапларга қўшилмайман. Мен ҳеч қачон Мессидан ёмонроқ бўлмаганман. Бу борада камтарлик қилмайман. Ҳар биримиз ўз йўлимиздан бордик, ўз услубимиз ва рекордларимиз билан тарихда қолдик. Лекин мен ўз фаолиятимда фақат сўз билан эмас, натижалар билан гапирдим,” — деди португалиялик юлдуз.
Футбол мухлисларига маълумки, уларнинг рақобати авж нуқтага етиши Испания чемпионатидаги йилларга тўғри келган. Ўшанда Месси “Барселона” шарафини ҳимоя қилар, Роналду эса “Реал Мадрид”нинг бош юлдузи эди. Ушбу даврдаги "Эл-Класико" тўқнашувлари бутун дунёдаги спорт оламининг энг кутилган воқеаларига айланарди.
Месси “Барселона” сафида саккиз бор “Олтин тўп” соҳиби бўлган, Европанинг энг нуфузли мусобақаси — Чемпионлар лигасида бир неча марта ғалаба қозонган. Аргентиналик юлдуз жаҳон чемпиони ҳамда Америка кубоги ғолиби сифатида тарихга кирган.
Роналду эса ўзининг бетакрор фаолиятида беш марта “Олтин тўп”ни қўлга киритган, “Реал Мадрид” билан тўрт бор Чемпионлар лигасида зафар қучган ва Португалия термаси билан Европа чемпиони ҳамда Миллатлар лигаси ғолиби бўлган. У клублар даражасида ҳам Испания, Англия ва Италия чемпионатларида чемпион бўлиб, ҳар бир мамлакатда ўз изини қолдирган ягона юлдузлардан биридир.
Икки футболчи фаолияти давомида нафақат ютуқлар, балки шахсий рекордлар билан ҳам бир-бирига тенг келди. Роналду ҳозирга қадар 950 дан ортиқ гол урган бўлса, Месси 890 га яқин тўп киритган. Иккаласининг ассистлар сони ҳам жаҳон даражасида рекорд сифатида қайд этилган.
Шу билан бирга, Роналдунинг фикрича, бу рақобат футболни янада чиройли ва қизиқарли қилди:
“Мен Мессини ҳурмат қиламан. У жуда катта футболчи. Аммо мен ўз ишимни қилдим, ўз рекордларимни ўрнатдим. Ҳар иккимиз ҳам футбол тарихи учун муҳим из қолдирдик. Шундай экан, ким зўр — буни вақт кўрсатади.”
Ҳозирда 40 ёшли Криштиану Роналду Саудия Про-лигаси доирасида “Ан-Наср” жамоаси сафида ўйнамоқда ва ҳануз юқори формада. Унинг ҳали ҳам жисмоний тайёргарлиги ва гол уриш самарадорлиги юқори даражада.
Лионель Месси эса “Интер Майами” билан АҚШнинг МЛС лигасида фаолият юритмоқда. Унинг жамоаси билан АҚШ футболидаги янги босқични бошлагани айни пайтда кўплаб мутахассислар томонидан юқори баҳоланмоқда.
Шу тариқа, икки юлдузнинг таққосланиши ҳали йиллар давомида муҳокама этилади. Бир нарса аниқ: Роналду ҳам, Месси ҳам футбол тарихини ўзгартирган, бутун авлодга илҳом бағишлаган жаҳон юлдузларидир.
“Zamin”ни Telegram'да ўқинг!
