“Арсенал” бош мураббийи Микель Артета Лига Кубоги чорак финалининг белгилаб берилган санасидан қаттиқ норозилик билдирди. Жамоа 23 декабрь куни “Кристал Пэлас” билан ўйнайди, бу эса “Эвертон”га қарши сафар баҳсидан атиги икки кун ўтгач бўлади.
Испаниялик мураббийнинг таъкидлашича, бундай жадвал футболчилар учун жуда оғир ва жароҳатлар сони кўпайиши хавфини оширади.
“Бизда еттита футболчи сафдан чиққан. Шундай ҳолатда таркиб кенглиги ҳақида гапиришнинг маъноси йўқ. Ҳужум чизиғида айниқса катта йўқотишлар бор. Агар ҳар уч кунда ўйин бўлса, бу нафақат жамоа, балки бутун Англия футболи учун хавфли. Биз ҳурмат ва адолатли муносабатни хоҳлаймиз”, — деди Артета.
Унинг фикрича, асосий масала — барча клублар учун тенг имконият яратишда: “Биринчи навбатда футболчилар соғлиги, кейин мухлислар манфаати, кейин эса барча жамоалар учун бир хил шароит бўлиши лозим. Умид қиламанки, Лига қарор чиқараркан, шуларни ҳисобга олади”.
Артета сўзларига кўра, “Арсенал” сўнгги ҳафталарда жуда кўп ўйин ўтказди ва бу оғир графикда ҳар бир ўйинчида жисмоний ҳамда руҳий чарчоқ йиғилаяпти. “Бу тақвимда хатто энг кучли футболчилар ҳам узоқ вақт бир хил темпда ўйнай олмайди. Биз шунчаки дам олиш учун эмас, соғлиқни асраш учун гапиряпмиз”, — дея таъкидлади у.
Шундай қилиб, “тўпчилар” учун декабрь ойи ҳақиқий синов бўлиши кутилмоқда. Бир томондан Лига Кубоги, иккинчи тарафдан Премьер-лига ўйинлари, шунингдек, Европадаги рақобат — буларнинг барчаси Артета жамоасини жиддий синовдан ўтказади.
“Zamin”ни Telegram'да ўқинг!
