Ўзбекистон аёллар шахмат терма жамоаси илк бор жамоавий жаҳон чемпионатига йўл олди. Бу муваффақиятга улар саралаш баҳсида Озарбайжон устидан ғалаба қозониб эришди.
Мазкур ҳал қилувчи учрашув 1-2 ноябрь кунлари Бокуда бўлиб ўтди. Тезкор шахмат формати бўйича ўтган қизғин баҳс натижаларига кўра, Ўзбекистон терма жамоаси таркибида Афруза Ҳамдамова, Гулруҳбегим Тоҳиржонова, Умида Омонова ва Гулдона Каримова иштирок этиб, 2,5:1,5 ҳисобида ғалаба қозонди.
Бу ғалаба жамоага тарихий тарзда чемпионатнинг финал босқичига йўл очди. Жаҳон чемпионати 18-23 ноябрь кунлари Испаниянинг Линарес шаҳрида ўтказилади.
Ўзбекистон терма жамоаси билан бирга яна 11 кучли жамоа, жумладан, Испания, Грузия, Франция, Қозоғистон, АҚШ, Хитой ва Ҳиндистон жамоалари ҳам иштирок этади.
