Европа Чемпионлар лигасининг тўртинчи турида “Ливерпуль” ўз майдонида Мадриднинг “Реал” жамоасини қабул қилади. Бу жаҳон футболидаги энг интиқлик билан кутилган учрашувлардан бири саналади. Мусобақанинг бу босқичида ҳар бир очко муҳим аҳамият касб этаётган бир пайтда, жамоалар нафақат ғалаба, балки обрў учун ҳам майдонга тушишади.
Учрашув олдидан “Ливерпуль” бош мураббийи Арне Слот журналистлар билан суҳбатда “Реал”нинг етакчи ҳужумчиси Винисиус Жуниор ҳақида фикр билдирди. Унинг таъкидлашича, Винисиуснинг ўйини рақиблар учун доим катта таҳдид ҳисобланади.
“Мен учун “Эл-Класико”даги Винисиуснинг алмаштиришга реакцияси эмас, балки ўйиннинг ўзи эсда қолган. Иккала жамоа ҳам жуда кучли, бир-бирини тўлиқ синовдан ўтказган. Винисиус эса ўша кечада яна бир бор ўзининг даражасини кўрсатди. Иккинчи дақиқада у жуда хавфли вазият яратди ва ҳатто пенальти ишлаб олганди, фақат VAR қарорни бекор қилди”, — деди Слот.
Мураббийнинг сўзларига кўра, “Ливерпуль” Винисиусга қарши алоҳида тайёргарлик кўрмоқда, чунки у яккама-якка вазиятларда тенгсиз футболчи.
“Биз шундай эпизодларга тайёр бўлишимиз лозим. Винисиуснинг тезлиги ва тўп билан ишлаши жуда юқори даражада. У икки, уч, ҳатто тўрт ҳимоячига қарши ҳам майдонда йўл топа олади. Бу — камдан-кам футболчиларда учрайдиган иқтидор. “Ювентус”га қарши ўйинда беш нафар ҳимоячи уни тўхтата олмади, шундоқ ҳам зарба бериб, тўпни устунга теккизган ва кейин у дарвозага кирган. Унинг шундай иродаси ва иштиёқи ҳурматга лойиқ”, — деб қўшимча қилди Арне Слот.
Мураббий шунингдек, “Реал” жамоаси билан бўладиган тўқнашув “Ливерпуль” учун жиддий синов эканини қайд этди. “Бу фақат Винисиус эмас, бутун “Реал” ҳақида гап. Улар жамоавий ҳаракат билан ўйнашади, ҳужумда эса ҳар бир футболчи хавфли. Бизга фақат интизом ва юқори темп керак бўлади. Шундагина ғалабага етиш мумкин”, — деди у.
Шу тариқа, Арне Слотнинг фикрича, “Реал” билан дуэл нафақат жамоавий, балки индивидуал маҳорат жиҳатидан ҳам ўта қизиқарли кечиши кутилмоқда. Тўқнашув бугун тун, Тошкент вақти билан соат 01:00 да старт олади.
“Zamin”ни Telegram'да ўқинг!
