Юлдузли ҳужумчи Криштиану Роналду "Манчестер Юнайтед"нинг ҳозирги ҳолати ҳақида фикр билдирди. Португалиялик футболчи жамоанинг сўнгги йиллардаги ўйинларини кузатиш унга оғир эканлигини тан олди.
"Уларнинг таркибида яхши футболчилар бор, лекин айримлари ҳатто "Манчестер Юнайтед" нима эканлигини ҳам билишмайди. Бу жуда ачинарли, чунки бу клуб дунёнинг энг муҳим жамоаларидан бири ҳисобланади ва у менинг юрагимда алоҳида ўрин тутади.
Олдинга интилиш учун, келажак учун пойдевор яратадиган ақлли одамларга эҳтиёж бор – худди "Манчестер Юнайтед" кўп йиллар аввал қилганидек. Ники Батт, Гари Невилл, Рой Кин, Дэвид Бекхэм – уларнинг барчаси буюк футболчига айланишди, лекин фаолиятларини ёшлар жамоасидан бошлашган.
Бугунги кунда "Манчестер Юнайтед"да бундай тизим йўқ. Умид қиламанки, бу ўзгаради, чунки клубда улкан салоҳият бор.
Бу XXI асрнинг энг йирик клубларидан биридир", – деди Роналду журналист Пирс Морганнинг дастурида.
Қайд этиш жоиз, "Манчестер Юнайтед" ҳозирги пайтда Англия чемпионати турнир жадвалида саккизинчи ўринни эгаллаб турибди.
Криштиану Роналду ушбу клуб сафида фаолиятининг икки даврини ўтказган.
“Zamin”ни Telegram'да ўқинг!
