Европа Чемпионлар лигасининг тўртинчи туридан ўрин олган баҳсда “Манчестер Сити” ўз майдонида Дортмунднинг “Боруссия” клубини 4:1 ҳисобида мағлуб этди. Бу ўйин нафақат “шаҳарликлар”нинг навбатдаги ишончли ғалабаси, балки Эрлинг Холанд учун тарихий рекорд билан ҳам ёдда қолди.
Норвегиялик тўпурар энди Европанинг энг нуфузли мусобақасида учта турли жамоа сафида бештадан ўйинда гол урган ягона футболчи сифатида тарихга кирди. Бунгача у “Зальцбург” ва “Боруссия Дортмунд”да ҳам ўз ҳужум маҳорати билан ажралиб турган эди.
Пеп Гвардиола ўйиндан сўнг журналистлар билан суҳбатда шогирди ҳақида фикр билдириб, унинг ютуғини юқори баҳолади:
— Ҳар гал матбуот анжумани олдидан Эрлинг янги рекорд ўрнатади. Бу йигит ҳақиқатан ҳам бошқача. Мен у билан фахрланаман. Холанд бундай даражага кучли муҳитда етиб келди — унинг атрофида жуда кучли футболчилар бор. Улар унинг салоҳиятини янада очиб бермоқда, — деди мураббий.
Гвардиоланинг таъкидлашича, топ-клублардаги жамоавий уйғунлик ҳар бир футболчининг ўйин кўрсаткичларини яхшилайди, Холанд эса бунинг яққол мисоли.
Эрлинг Холанд “Манчестер Сити” сафини 2022 йил ёзида тўлдирган эди. У клуб билан 2034 йилнинг ярмигача амал қилувчи шартномага эга. Жорий мавсумда норвегиялик ҳужумчи барча турнирларда 18 та ўйинда иштирок этиб, рақиб дарвозасини 21 марта ишғол қилди.
Шу тариқа, у нафақат “Сити”нинг етакчиси, балки Европанинг энг хавфли ҳужумчиларидан бири сифатида ўз мавқеини яна бир бор мустаҳкамлади. Холанднинг рекорди — унинг меҳнатсеварлиги, сўнгги йиллардаги юқори даражадаги барқарорлиги ва Гвардиоланинг тизимли иш услубининг натижаси экани шубҳасиз.
Мухлислар эса энди норвегиялик юлдуздан навбатдаги гол ва янги рекордни кутишмоқда.
“Zamin”ни Telegram'да ўқинг!
