Италияда “Аталанта” клубида яна беқарорлик кузатилмоқда — бу сафар воқеа марказида жамоа етакчиларидан бири, нигериялик ҳужумчи Адемола Лукман турибди. Goal Italia’нинг ёзишича, Чемпионлар Лигаси доирасидаги “Марсел”га қарши кечган (0:0) учрашув пайтида у бош мураббий Иван Юрич билан очиқча тортишувга киришган.
74-дақиқада Юрич Лукманни алмаштиришга қарор қилганида, футболчи бундан жуда норози бўлди. У майдонни тарк этаётган чоғда мураббийга бир нечта гаплар айтган, Юрич эса ўз навбатида кескин жавоб қайтарган. Бир лаҳзада иккиси ўртасида тортишув авж олган ва ёрдамчи мураббийлар вазиятни зўрға тинчлантиришган.
Учрашувдан сўнг Иван Юрич бу ҳақдаги саволларга жавоб берди ва “бу фақат ҳиссиётлар, бошқа ҳеч нарса эмас” деб изоҳ берди. Бироқ телекадрларда вазиятнинг жиддийроқ кўриниш олгани яққол кўринди.
Баъзи италиялик журналистларнинг таъкидлашича, бу ҳолатнинг илдизи ёзги трансфер ойнасига бориб тақалади. Ўшанда Лукман “Аталанта”ни тарк этишни хоҳлаб, бир неча кунлик машғулотларга ҳам келмаганди. Унга “Интер” клуби жиддий қизиқиш билдирган, аммо бергамоликлар ҳужумчи учун сўралган нархни пасайтиришдан бош тортган. Шунинг учун трансфер амалга ошмаган.
Шундан кейин Лукман жамоага қайтиб, сўнгги саккиз ўйиндан еттисини асосий таркибда ўтказган ва “Милан” дарвозасига муҳим гол урганди. Аммо “Марсел”га қарши баҳсдаги можаро Лукман ва Юрич ўртасидаги муносабат ҳали ҳам тўлиқ барқарор эмаслигини кўрсатмоқда.
Журналистлар таъкидлашича, агар бу низо ҳал этилмаса, Лукманнинг “Аталанта”даги келажаги шубҳа остида қолиши мумкин. Шунингдек, қишки трансфер ойнасида у янги жамоа топиши эҳтимолдан холи эмас.
Келгуси ҳафтада “Аталанта” “Сассуоло”га қарши баҳс олиб боради. Бу ўйин Лукман учун синов бўлади: у асосий таркибда майдонга тушадими ёки йўқми — айнан шу қарор унинг жамоадаги мавқеини белгилаб бериши мумкин.
Италия спорт матбуоти ёзганидек, “Аталанта”да ҳозир ички муҳит тинч эмас. Ҳужумдаги етакчи билан мураббий ўртасидаги кескинлик клубнинг кейинги натижаларига ҳам таъсир қилиши эҳтимолдан холи эмас. Мухлислар эса бу вазият яқин орада барқарорлашишига умид қилмоқда.
“Zamin”ни Telegram'да ўқинг!
