Қатарда ўтказилаётган 17 ёшгача бўлган футболчилар ўртасидаги Жаҳон чемпионати қизғин паллага кирди. Бу йилги мундиал ўз тарихида илк бор 48 та мамлакат терма жамоалари иштирокида ўтказилаётгани билан тарихга кирди. Халқаро футбол ассоциацияси (ФИФА) томонидан ташкил этилган бу мусобақа ёш истеъдодлар учун катта саҳнага айланмоқда.
ФИФА расмий сайти мусобақанинг илк туридан сўнг “Олтин бутса” учун курашда етакчи бўлган футболчилар рўйхатини эълон қилди. Унга кўра, Чехия терма жамоаси аъзоси Вит Шкркон биринчи учрашувда хет-трик қайд этиб, тўпурарлар пойгасида якка пешқадам сифатида қайд этилди.
Шу билан бирга, иккитадан гол урган тўққиз нафар футболчи ҳам рейтингда юқори поғоналарни эгаллаб турибди. Улар орасида Туниснинг Феди Тайечи ва Вассим Сламаси, Португалиялик Анисио Кабрал, Бразилия вакили Делл, Замбиядан Абель Ньиронго, КХДР футболчилари Ри Кан Рим ва Ким Ю Жин, Чехиялик Петр Потмесил ҳамда ўзбекистонлик Азизбек Абдумўминов бор.
Ўзбекистон U-17 терма жамоаси илк баҳсни Парагвайга қарши ўтказиб, 2:1 ҳисобида зафар қучди. Ўйинда икки бор рақиб дарвозасини ишғол этган Азизбек Абдумўминов нафақат баҳс қаҳрамонига, балки ФИФА томонидан тўпурарлар рўйхатидаги етакчи номзодлардан бири сифатида қайд этилди.
ФИФА маълумотида таъкидланишича, ёшлар чемпионати доимо янги юлдузлар ва келажакда катта саҳнага чиқадиган футболчиларни кашф этади. Илгари ҳам U-17 мусобақалари орқали кўплаб машҳур футболчилар ўз йўлини бошлаган — улар орасида жаҳон футболи афсоналарига айланган ўйинчилар ҳам бор.
Ислом Исмоилов шогирдлари учун кейинги синов — жума куни бўлиб ўтадиган Ирландия Республикасига қарши беллашув бўлади. Ирландия биринчи турда Панамани йирик 4:1 ҳисобида мағлуб этгани сабабли, мазкур тўқнашув “J” гуруҳида пешқадамлик тақдири учун ҳал қилувчи баҳс бўлиши кутилмоқда.
Ўзбекистон терма жамоаси футболчиларининг жисмоний тайёргарлиги, тактик ҳаракатлари ва ғалабага бўлган иштиёқи ёш мухлислар орасида ҳам катта қизиқиш уйғотди. Маҳаллий спорт таҳлилчилари фикрича, агар Азизбек Абдумўминов ўз ўйинини шу темпда давом эттирса, у нафақат жамоа етакчиси, балки бутун чемпионат юлдузига айланиши мумкин.
Ўзбекистон мухлислари эса эндигина катта саҳнага қадам қўйган бу ёш авлоддан янги ғалабалар ва ёрқин лаҳзалар кутмоқда.
“Zamin”ни Telegram'да ўқинг!
