Суперлига 28-туридан ўрин олган “Бухоро” – “Нефтчи” учрашуви 1:1 ҳисобида якунланди. Беллашувдан сўнг фарғоналиклар бош мураббийи Виталий Левченко матбуот анжуманида жамоа ўйини ва майдон шароити ҳақида ўз фикрларини билдирди.
“Курашга бой, жуда шиддатли баҳс бўлди. Ҳар икки жамоа ҳам майдонда ўзини аямади. Бироқ шуни айтиш керакки, бугун нафақат рақиб билан, балки майдоннинг ҳолати билан ҳам курашишга тўғри келди. Газон сифати яхши эмасди, тўп ҳаракатидаги ноаниқликлар ўйинга таъсир қилди. Бундай шароитда ижодкор ёки комбинацион футбол кўрсатиш деярли имконсиз. Биз эса айнан шундай услубда ўйнашга ўрганган жамоамиз.
Шунга қарамасдан, йигитлар бор кучини берди. Чемпионат ҳали якунланмади, демак, ҳар бир очко учун кураш давом этади. Биз ҳали ҳам мақсадимиз учун ҳаракатдамиз”, — деди мураббий.
Журналистлар Левченкодан “Бухоро” қай жиҳатдан ноқулайлик туғдиргани ва биринчи бўлимда нега “Нефтчи” ўйин ритмини топа олмагани ҳақида ҳам сўрашди.
“‘Бухоро’ жамоаси кучли жисмоний тайёргарликка эга. Улар кўпинча ҳаводаги тўплар ва кучли курашларга таянади, шундай услубда ўйнайди. Шу боис улар билан рақобат қилишда жуда эҳтиёт бўлиш керак эди. Биринчи бўлимда биз ўйинга киришиш ва майдонга мослашиш билан овора бўлдик, шу сабаб ҳаракатимиз бироз секин кечди. Иккинчи таймда эса вазиятни тўғри баҳолаб, ўйинни жонлантирдик.
Аммо бир футболчимиз майдондан четлатилганидан кейин устунликни ушлаб туриш осон бўлмади. Шу сабаб дуранг билан чекландик. Бу ўйинда асосий сабоқ — ҳар бир дақиқада интизом ва диққатни йўқотмасликдир”, — деб таъкидлади Левченко.
Эслатиб ўтамиз, “Нефтчи” ҳозирча 28-тур натижаларига кўра, мусобақа жадвалида “Насаф”дан 3 очко олдинда бормоқда. Қаршиликлар ўз навбатида “Машъал”га қарши баҳсда иштирок этади.
Левченконинг фикрича, чемпионат сўнгги турларга кириб келгани сайин ҳар бир ўйин нафақат тактик жиҳатдан, балки руҳий жиҳатдан ҳам синовга айланмоқда. “Бу босқичда хато учун жой йўқ. Биз охиригача курашамиз”, — деди у.
“Zamin”ни Telegram'да ўқинг!
