Саудия Арабистони пойтахти Ар-Риёдда бўлиб ўтаётган VI Ислом Бирдамлиги ўйинларида юртимиз боксчилари яна бир бор эл байроғини баланд кўтаришди.
Бугун мусобақанинг энг масъулиятли босқичи — финал жанглари бўлиб ўтди. Бу босқичда Ўзбекистон терма жамоасидан 4 нафар спортчи рингга чиқиши белгиланган эди. Улардан икки нафари ўз баҳсларини якунлаб, мухлисларга шодлик ва ғурур туйғуларини улашишди.
-60 кг вазн тоифасидаги финалда боксчимиз Одинахон Исмоилова туркиялик Эвин Эргиногуз билан кескин ва шиддатли жанг олиб борди. Барча раундларда рақибнинг тажрибаси устун келди ва баҳс 0:5 ҳисоби билан якунланди. Шу тариқа Исмоилова жангни кумуш медаль билан якунлаб, юртимиз делегацияси хазинасига яна бир мукофот қўшди.
Шунингдек, 65 килограмм вазнда жанг қилган Абдуллоҳ Мадаминов финалда жазоирлик рақиби Жугурта Аит Беккани мутлақ устунлик билан мағлуб этди. Ҳисоб — 5:0. Мадаминов барча раундларда ташаббусни қўлдан бермади ва рингдаги устунлиги билан олтин медални қўлга киритди.
Бу ғалаба нафақат боксчимиз учун, балки бутун терма жамоа ва мухлислар учун ҳам катта ифтихор бўлди. Мадаминовнинг рингдаги ишончли ҳаракатлари, аниқ зарбалари ва жисмоний тайёргарлиги унинг бу мукофотга муносиб эканини яна бир бор исботлади.
Эслатиб ўтамиз, Ар-Риёддаги VI Ислом Бирдамлиги ўйинларида юртимизнинг бир неча спорт турлари бўйича вакиллари иштирок этмоқда. Боксчиларимиз эса ҳар галгидек ўз маҳоратлари ва иродалари билан мухлислар қалбидан чуқур ўрин олмоқда.
Бугунги кунда терма жамоамизнинг умумий медаллар сони ортиб бораётгани Ўзбекистон спортидаги барқарор ривож ва янги авлод спортчиларининг ўсиб келаётганини намоён этмоқда. Мусобақа эртага ҳам давом этади — рингда яна икки ҳамюртимиз олтин медал учун кураш олиб боради.
“Zamin”ни Telegram'да ўқинг!
