Каталония пойтахтида “Барселона” атрофида яна катта шов-шув бошланди. Клубнинг энг буюк рамзларидан бири, собиқ футболчи Лионель Месси 2026 йилда бўлиб ўтадиган президентлик сайловларида амалдаги раҳбар Жоан Лапортага қарши чиққан номзодларни қўллаб-қувватлашга қарор қилди, деб ёзади ABC нашри.
Маълумотларга кўра, аргентиналик юлдуз бу қарорни эҳтиёткорлик билан қабул қилган, аммо унинг сабаблари жуда шахсий ва чуқур илдизларга эга. Месси ҳали ҳам 2021 йилда Каталония клубини тарк этишга мажбур бўлганини Жоан Лапорта раҳбариятининг хатоси ва хиёнати сифатида қабул қилади. Унинг фикрича, айнан Лапорта ва унинг молиявий сиёсати сабаб, “Барселона”да қолиш имкони йўқолган.
Ҳамон кўплаб мухлислар учун афсона сифатида қадрли бўлган Месси клуб билан муносабатларни тузатишга уринишларига қарамай, раҳбарият билан бўлган узоқ йиллик ишонч қайта тикланмаганини яширмайди. У 2021 йилдаги воқеани шундай эслайди: маошини икки баробарга қисқартиришга рози бўлганига қарамасдан, Лапорта харажатларни қисқартириш баҳонасида келишувни бекор қилган.
Шу ҳолатдан сўнг Месси “Пари Сен-Жермен”га ўтишга мажбур бўлган ва шу вақтдан бери клуб раҳбарияти билан муносабатлар жиддий тарзда совуқлашган. Эндиликда у Лапортага қарши бўлган гуруҳлар билан яқин мулоқотда. Улар “Барселона”нинг янги даврини бошлаш учун ягона кучли номзодни илгари суриш ниятида бирлашмоқда.
Манбаларнинг таъкидлашича, Месси сайловда фақат ҳақиқатан ҳам ғолиб чиқиш имкониятига эга бўлган номзодни қўллаб-қувватлаш ниятида. Бу эса унинг клуб сиёсатидаги таъсирини янада кучайтиради. Чунки аргентиналик юлдузнинг фикри Каталониядаги миллионлаб мухлислар учун муҳим аҳамиятга эга.
Бугунги кунда “Барселона” ичида мухлислар фикри иккига бўлинган. Айримлар Лапорта клубни иқтисодий таназзулдан олиб чиққан деб ҳисобласа, бошқалар унинг сиёсатини футбол анъаналарига зид, деб баҳоламоқда. Месси эса иккинчи томонда — у клубни қайта очиқлик, ҳурмат ва қадриятлар асосида бошқариш керак, деб ҳисоблайди.
Экспертлар фикрича, 2026 йилги сайловлар “Барселона” тарихи учун ҳал қилувчи бўлади. Агар Месси қўллаётган номзод ғалаба қозонса, бу нафақат клубнинг ички сиёсатини, балки унинг келажак йўналишини ҳам тубдан ўзгартиради.
Лионель Месси “Барселона”нинг энг улуғ тарбияланувчиси сифатида клуб тарихи ва мухлислар қалбида алоҳида ўринга эга. Шу боис унинг сиёсий позицияси, эҳтимол, келгуси йиллардаги жамоа тақдирини белгилаб беради.
“Zamin”ни Telegram'да ўқинг!
