Қатарда бўлиб ўтаётган ФИФА U-17 Жаҳон чемпионати қизғин давом этмоқда. Айни пайтда Исломбек Исмоилов бошчилигидаги Ўзбекистон ёшлар терма жамоаси 2-турдан сўнг “J” гуруҳида иккинчи ўринни эгаллаб, плей-офф босқичига чиқиш учун жиддий кураш олиб бормоқда, деб хабар берди Ўзбекистон футбол ассоциацияси (ЎФА).
Турнир жараёнида ЎФА биринчи вице-президенти Равшан Ирматов жамоа аъзолари билан учрашув ўтказди. Ушбу мулоқотда ўйинчиларнинг жисмоний ҳолати, руҳий тайёргарлиги, турнирдаги иштироки ва уларга яратилган шароитлар батафсил муҳокама қилинди.
Ирматов сўз бошида жамоа аъзоларига ишонч билдирди ҳамда уларнинг мамлакат шарафини муносиб ҳимоя қилаётганини таъкидлади:
“Сизлар миллионлаб футбол мухлисларининг умиди ва ифтихорисизлар. Ўзбекистонда ҳамма сизларга ишонади. Осиё кубогида қандай фидойилик кўрсатган бўлсангизлар, бу мусобақада ҳам шундай курашчанлик намоён этинглар”, — деди у.
Учрашув давомида жамоанинг умумий тайёргарлик жараёни ҳақида ҳам сўз борди. Исломбек Исмоилов жамоа таркибидаги барча футболчилар юқори кайфиятда эканини, мусобақа муҳитини ҳис қилиб туришини маълум қилди. Унинг таъкидлашича, футболчилар нафақат натижа, балки мамлакат шарафи учун бор кучини бермоқда.
Мураббийлар штаби билан жамоанинг сўнгги икки турдаги ўйинлари таҳлил қилинди, келгуси баҳсларга тайёргарлик режаси кўриб чиқилди. Ирматов уларга профессионал ёндашув, интизом ва жамоавий руҳни сақлаб қолиш муҳимлигини уқтирди.
Учрашувда тиббий штаб аъзолари ҳам иштирок этиб, ўйинчиларнинг соғлиғи ва тикланиш жараёни бўйича маълумот берди. Шу муносабат билан Равшан Ирматов футболчиларнинг витамин баланси, дам олиш ва тикланиш жараёнларига жиддий эътибор қаратишни тавсия қилди. У барча шароитлар футболчиларнинг максимал имконият билан майдонга чиқиши учун яратилиши лозимлигини таъкидлади.
Мусобақадаги иштирок давомида ЎФА мутасаддилари жамоа аъзолари билан доимий алоқада бўлиб, уларни қўллаб-қувватлаб келмоқда. Ирматовнинг таъкидлашича, жамоанинг бу босқичдаги ҳар бир ўйини мамлакат футболининг келажагига таъсир кўрсатади ва ёшлар учун катта тажриба мактаби бўлади.
Учрашув охирида Равшан Ирматов терма жамоа аъзоларига омад тилаб, уларни ғалабага ундади:
“Сизлар бугун нафақат ўзингизни, балки бутун мамлакатни намоён этяпсизлар. Ҳар бир ўйинда руҳ ва ифтихор билан ҳаракат қилинглар. Ўзбекистоннинг ёшлари сизлар орқали футболнинг янги саҳифасини ёзишига ишонаман”, — деди у.
Шундай қилиб, Ўзбекистон U-17 терма жамоаси нафaқат чемпионатдаги иштирок, балки уюшқоқлик ва жамоавий руҳи билан ҳам мухлислар қалбидан жой олмоқда. Энди барча назарлар кейинги баҳслардаги натижаларга қаратилган — чунки бу ёш терма жамоа ҳақиқатан ҳам келажак умиди ҳисобланади.
