Қатарда ўтаётган U-17 Жаҳон чемпионати 1/16 финали олдидан Хорватия ўсмирлар терма жамоаси ҳимоячиси Рауль Кумар Ўзбекистонга қарши бўладиган муҳим беллашув ҳақида фикр билдирди. Унинг таъкидлашича, жамоа плей-офф босқичига катта мақсадлар билан келган ва бу босқичда ҳар бир дақиқа учун курашга тайёр.
– Биз бу ерга тасодифан келмадик. Қатардаги мусобақага олдиндан пухта тайёргарлик кўрдик. Ҳар бир ўйинимиздаги ҳаракатимиз ва интизомимиз орқали ўз салоҳиятимизни кўрсатдик. Бу турнирда узоққа боришни мақсад қилганмиз ва шундай бўлиши учун барчамиз жон куйдирамиз, – деди “Истра” клуби аъзоси Кумар.
Ёш ҳимоячи жамоадошлари билан биргаликда гуруҳ босқичидаги барча учрашувларда муваффақиятли иштирок этди ва эндиликда уларнинг барча диққат-эътибори Ўзбекистонга қарши беллашувга қаратилган.
Беллашув олдидан кайфият
Хорватия ўсмирлар жамоаси “С” гуруҳида иккинчи ўринни эгаллаб, муваффақиятли ўйин намойиш этди. Улар Сенегал ва БААга қарши баҳсларда яхши натижалар қайд этди ва эндиликда ўз мақсадларини амалга ошириш учун кейинги босқичга ишонч билан қадам қўймоқда.
Мутахассислар фикрича, бу икки терма жамоа ўртасидаги тўқнашув турнирнинг энг қизиқарли баҳсларидан бирига айланиши мумкин. Чунки ҳар икки томон ҳам ёш ва шижоатли футболчиларга эга, уларнинг услуби эса ҳужумкор ва тезкор ўйинга асосланган.
Беллашув санаси ва вақти
Ўзбекистон ва Хорватия ўсмирлар терма жамоалари ўртасидаги учрашув 15 ноябрь куни, Тошкент вақти билан 20:45 да старт олади. Ушбу баҳсда ғалаба қозонган жамоа чорак финалга йўл олади ва мусобақада ўз йўлини давом эттиради.
Футбол мухлислари учун бу кеча – навбатдаги синов ва янги тарихни ёзиш имконияти бўлади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
