Бирлашган Араб Амирликларида ташкил этилган нуфузли Al Ain Cup мусобақаси тобора қизий бормоқда. Бу йилги турнирнинг махсус аҳамияти шундаки, унда 2026 йилги Жаҳон чемпионатига йўллама олган тўртта кучли терма жамоа — Эрон, Кабо-Верде, Ўзбекистон ва Миср иштирок этмоқда. Шу боис ҳар бир беллашув юқори даражадаги рақобат ва катта масъулият остида кечмоқда.
Яримфиналнинг иккинчи учрашуви эса ҳақиқий драматизм ва маҳорат намойишига айланди. Фабио Каннаваро бошқарувидаги Ўзбекистон миллий жамоаси Мисрга қарши жуда муҳим баҳс ўтказди ва ўйинни тўлиқ назорат қилиб, 2:0 ҳисобида муносиб ғалабага эришди.
Беллашувнинг ўзи эса жуда эрта қизиб кетди. Ҳали 4-дақиқа ҳам тўлмай, Остон Ўрунов ўзининг ўткир дриблинглари ва шахсий маҳоратини намоён этиб, рақиб ҳимоячиларини бирин-кетин ортда қолдирди ва дарвозани аниқ нишонга олди. Ўйиннинг дастлабки қисмидаги ушбу гол жамоага ишонч, мухлисларга эсa катта руҳий қувват бағишлади.
Бироқ Ўрунов шуни билан тўхтаб қолмади. Танаффусга яқин яна бир ҳужум марказида пайдо бўлиб, биринчи тайм якунланишидан олдин ҳисобни 2:0 қилиб узайтирди. Шу тариқа, Ўруновнинг дубли нафақат ўйин тақдирини ҳал қилди, балки ўзи учун ҳам катта миқдорда ишонч бағишлаган ўйин сифатида тарихда қолди.
Иккинчи таймда ҳам ўзбекистонликлар қаттиқ интизом, тўғри тактика ва жамоавий ҳаракат билан ғалабани сақлаб қолди. Каннаваро шогирдлари мусобақа давомида ҳар ўйинда янги тактик вариантларни синовдан ўтказаётгани ва таркибда ротация қилаётганига қарамай, умумий ўйин сифати пасаймагани эътиборга молик.
Энди Ўзбекистон финалда!
18 ноябрь куни ҳал қилувчи баҳсда рақиб — Эрон. Бу нафақат финал, балки Осиёдаги икки кучли жамоанинг ўзига хос дастлабки разведка жангидир. Чунки ҳар икки терма жамоа 2026 йилги Жаҳон чемпионатига жиддий тайёргарлик кўрмоқда.
Миср учун эса кураш тугамади — улар 3-ўрин учун Кабо-Верде билан майдонга тушади.
Al Ain Cup. Яримфинал
Ўзбекистон – Миср 2:0
Голлар: Остон Ўрунов (4, 43)
Ўзбекистон таркиби:
Неъматов, Алижонов (Сайфиев, 90), Абдуллаев, Алиқулов (Ашурматов, 90), Ҳусанов, Насруллаев, Ғаниев (Мозговой, 53), Шукуров (Ҳамдамов, 69), Ҳамробеков, Ўрунов (Эркинов, 53), Шомуродов.
Миср таркиби:
Собҳи, Рабиа, Ҳамдий, Ҳаний, Атийя, Фатҳӣ, Зизо, Файсал, Салоҳ, Усмон, Мустафо Муҳаммад (Моҳсен, 68).
Ўруновнинг жонли ўйини, Каннаваронинг муваффақиятли тактикаси ва жамоанинг бир йўналишда қўйилган ҳаракатлари — буларнинг барчаси Ўзбекистоннинг бу йилги терма жамоаси янада кучайганини кўрсатмоқда. Финал эса — ҳақиқий синов.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
