Мисрга қарши жанговор ва мазмунли ўйиндан сўнг Ўзбекистон термаси ярим ҳимоячиси Отабек Шукуров журналистлар саволларига жавоб қайтариб, жамоанинг кайфияти, тайёргарлик жараёни ва финалга қарата режалари ҳақида фикр билдирди. Унинг гапларидан терма жамоадаги ишонч, руҳий кўтаринкилик ва жаҳон чемпионати олдидан жуда муҳим тажриба орттираётгани яққол сезилади.
Шукуров аввало ғалаба ва финал йўлланмаси билан барча мухлисларни табриклади:
«Ютиб олдик, финалга чиқдик. Миср кучли терма жамоа, биз эса унга муносиб қаршилик кўрсатдик. Бундай ўйинлар жаҳон чемпионати олдидан биз учун энг яхши синов. Африка ва бошқа қитъа жамоаларига қарши кўпроқ ўйнашимиз даркор. Чунки мундиалда ким тушиши номаълум, рақибларни ҳис қилиб бориш — катта тажриба. Бугун мухлисларни хурсанд қилдик, деб ўйлайман. Финалда Эронга қарши яна чемпионлик учун бор кучимиз билан ўйнаймиз».
Ўйинда ҳужумкор услубда ўйнаган жамоа ҳақида сўз кетганда, Отабек мураббийлар бригадасининг тайёргарлик жараёнини алоҳида эътироф этди:
«Йиғин бошланганидан бери мураббийлар тўрт кун давомида Мисрнинг ўйин услубини тушунтириб борди. Урган голларимиз ҳам тренерлар меҳнати самараси. Бизга рақибни қандай ёпиш, қаерда босим бериш, қайси зоналарда прессинг қилиш, ҳатто дарвозабон билан бирга-бир вазиятгача қандай етиб бориш кераклигини ҳам ўргатишди. Кам бўлса ҳам, шу топшириқларни бажардик деб ўйлайман. Шунинг ҳисобига ғалаба бизнинг томонда бўлди».
Ўйин давомида ҳакамлар фаолиятига нисбатан пайдо бўлган фикрлар ҳақида ҳам Шукуров очиқ гапирди:
«Ростини айтсам, бизга ҳам ҳакамларнинг Эрон ва Миср финалда тўқнашишига мойил экандек туюлди. Симпатия кўпроқ улар тарафда бўлгандек бўлди. Лекин шунга қарамай, Аллоҳ бизга ғалаба насиб этди».
Шукуровнинг фикрлари шундан далолат берадики, Ўзбекистон термаси нафақат ўйин сифати бўйича, балки руҳий жиҳатдан ҳам катта ўсишда. Йигитлар ҳар бир беллашувни жаҳон чемпионати олдидан муҳим тажриба деб билишмоқда ва финалда яна бир бор барча кучни ишга солишга тайёр. Мухлислар эса эндиликда 18 ноябр куни бўладиган ҳал қилувчи баҳсни катта интизорлик билан кутмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
