10:03 / 15.11.2025

U-17 ЖЧда плей-офф драмаси: пенальтилар юлдузга айланган кеча

Қатарда ўтаётган ўсмирлар ўртасидаги жаҳон чемпионати плей-офф босқичи жуда эҳтиросли ва кескин беллашувларга бой бўлмоқда. Ҳар бир баҳсда жамоалар охирги дақиқагача кураш олиб борди, айрим учрашувларнинг тақдири эса лотерея — пенальтилар сериясида ҳал бўлди.

Кунни Португалия ва Белгия ўртасидаги қарама-қаршилик очиб берди. Португалия термаси ўйин бошиданоқ ташаббусни қўлга олиб, 2:1 ҳисобида зафар қучди ва кейинги босқичга муносиб равишда йўл олди. Кейинги баҳсларда ҳам шиддат баланд бўлди. Замбия ва Мали тўқнашувида африкалик жамоаларнинг тезкор, жисмоний футбол намойиши кузатилди — Мали 3:1 ҳисобида ишончли ғалаба қозонди.

Швейцария ва Миср баҳсида европаликлар устун келди. Швейцария ўйинни тўлиқ назорат қилиб, 3:1 ҳисобида муваффақият қозонди. Франция эса Колумбияга қарши вазиятларни қаттиқ назорат қилди ва 2:0 ҳисобида бу босқичдан осон ўтди.

Куннинг энг драматик учрашувларидан бири Аргентина — Мексика баҳси бўлди. Курашчан тарзда кечган беллашув 2:2 ҳисобида якунланди. Пенальтиларда эса мексикаликлар муваффақият қозониб, кейинги босқич йўлланмасига эга чиқишди.

Шунингдек, Ирландия — Канада баҳси ҳам тенглик кайфиятида ўтди. Асосий вақт 1:1 ҳисобида якунланаётганда, кельтлар пенальтиларда 9:8 ҳисобида зафар қучиб, мусобақадаги юришини давом эттириш имконига эга бўлди.

Жаҳон чемпионатининг доимий фаворитларидан бири Бразилия Парагвайга қарши ғалаба учун қаттиқ тер тўкди. Асосий дақиқалар 1:1 ҳисобида ниҳояланган баҳсда бразилияликлар пенальтилар сериясида 5:4 ҳисобида устун келди.

АҚШ — Марокаш ўйини ҳам шундан фарқсиз тарзда кескин кечди. 1:1 ҳисобида тугаган баҳсда америкаликлар пенальтиларда 4:3 ҳисобида ғолиб чиқишди.

ЖЧ U-17. Плей-офф натижалари:

- Португалия – Белгия 2:1
- Замбия – Мали 1:3
- Швейцария – Миср 3:1
- Франция – Колумбия 2:0
- Аргентина – Мексика 2:2 (пен: 4:5)
- Ирландия – Канада 1:1 (пен: 9:8)
- Бразилия – Парагвай 1:1 (пен: 5:4)
- АҚШ – Марокаш 1:1 (пен: 4:3)

Плей-оффнинг бу тури ёш футболчиларнинг рўҳий тайёргарлиги қанчалик муҳим эканини яна бир бор кўрсатди. Келаси босқичда эса янада катта драмалар, кескин ёндашувлар ва янги қаҳрамонлар пайдо бўлиши шубҳасиз.