“Реал Мадрид” ёзги трансфер ойнаси яқинлашар экан, жамоа ичида жиддий ўзгаришлар муҳокама қилинмоқда. Мадрид клуби раҳбарияти бир неча мавсумдан буён асосий таркибда ўйнаб келаётган икки тажрибали ҳимоячи — Антонио Рюдигер ва Давид Алаба билан хайрлашишни режалаштираётгани айтилмоқда.
Испаниянинг машҳур “AS” нашри ёзишича, клуб раҳбариятини икки футболчининг бир-бирига ўхшаш муаммоси — тез-тез жароҳат олиши жиддий безовта қилмоқда. Уларнинг соғлиғи билан боғлиқ муаммолар жамоанинг ўйин тизимига, айниқса, муҳим баҳсларда катта таъсир кўрсатган. Шу боис, раҳбарият янги мавсумга тўлиқ соғлом ва барқарор ҳимоя чизиғи билан киришни мақсад қилган.
Яна бир муҳим жиҳат — Рюдигер ҳамда Алабанинг шартномалари келаси ёзда якунланади. Бу эса “қироллик клуби”га уларни эркин агент сифатида йўқотмасдан, ҳисобга тушум олиб қолиш имконини беради. Айнан шунга кўра, клуб уларни қишки ёки ёзги трансферда сотиш масаласини жиддий кўриб чиқмоқда.
Давид Алаба 2021 йилдан буён Мадрид шарафини ҳимоя қилиб келмоқда ва ушбу давр мобайнида муҳим ғалабаларда ўз ҳиссасини қўшган. Антонио Рюдигер эса 2022 йилда жамоага қўшилиб, менталитети ва жисмоний кучи билан мухлислар меҳрини қозонган. Бироқ жароҳатлар уларнинг ўйинини силжитиб, юқори барқарорликдан узоқлаштирди.
Айни вақтда Хаби Алонсо бошқараётган жамоа Ла Лигада 12-турдан сўнг 31 очко билан етакчилик қилмоқда. Мадрид клуби мусобақада кучли ритм сақлаётган бўлса-да, ҳимоя чизиғидаги муаммоларни ёзги мавсумда тубдан ҳал қилиш ниятида.
“Реал Мадрид”нинг олдиндан режалаштирилаётган қайта қуриш жараёни мухлислар орасида қизғин муҳокамага сабаб бўлмоқда. Янги мавсумда жамоа ҳимояси қандай кўриниш олиши — бу савол ҳозирдан интрига яратаётгани турган гап.
Меҳмон гуруҳидаги фойдаланувчилар ушбу мақолага изоҳ қолдира олмайди.
