UFCнинг яримўрта вазн тоифасида жорий чемпион сифатида октагонга қадам қўйган Ислом Махачев навбатдаги жангини ҳам ишончли тарзда якунлаб, нафақат ғалаба қозонди, балки жуда салмоқли даромад ҳам кўрди. Sporty Salaries тарқатган ҳисоб-китобларга кўра, у австриялик рақиби Жек Делла Маддаленага қарши кечган UFC 322 жангидан 3 миллион доллардан ортиқ маблағ ишлаб олган.
Турнир марказига айланган беллашув 5 раунддан иборат бўлиб, Махачев ҳар бир дақиқада устунликни қўлда ушлаб турди. Ҳакамлар ҳам унинг афзаллигини бирдек тан олишди ва жангни якдил қарор билан россиялик спортчи фойдасига ҳал қилишди. Мазкур натижа унга чемпионлик камарини яна бир бор мустаҳкамлаб қолиш имконини берди.
Молиявий рақамларга эътибор қаратсак, Махачевнинг умумий тушуми 3,332 миллион долларга тенг бўлди. Унинг даромади қуйидагича тақсимланган:
— октагонга чиқиш учун тўлов – 800 минг доллар
— расмий ҳомийлик битимлари – 32 минг доллар
— пуллик трансляциялар (PPV)дан улуш – 2,5 миллион доллар
Жангнинг иккинчи иштирокчиси Жек Делла Маддалена ҳам яхши маблағ қўлга киритди. Унинг даромади 1,992 миллион долларни ташкил этди:
— октагонга қадам қўйиш – 750 минг доллар
— ҳомийлик пакетлари – 42 минг доллар
— PPVдан тушган улуш – 1,2 миллион доллар
34 ёшли Ислом Махачевнинг бу ғалабаси унинг карьерасидаги яна бир муҳим босқич бўлди. Унинг ғалабалар силсиласи эндиликда 16 та жангдан иборат бўлиб, у шу ёрдамда Андерсон Силванинг тарихий натижасини ҳам такрорлади. Бундай барқарорлик ва ирода унинг UFC тарихидаги энг барқарор чемпионлардан бирига айланаётганини кўрсатиб турибди.
Махачевнинг яримўрта вазндаги ҳукмронлиги давом этар экан, мухлислардаги асосий савол — уни ким тўхтата олади? Ҳозирча эса жавоб аниқ: Ислом Махачев октагонда ҳам, молиявий кўрсаткичларда ҳам олдинда бормоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
