Ўзбекистон миллий жамоаси ҳамда «Пахтакор»нинг тажрибали ҳужумчиси Игор Сергеев яна бир муҳим қарор остонасида турибди. Footballi нашри маълум қилишича, Эрон Пролигасининг етакчи жамоалари — «Истиқлол» ва «Персеполис» форвардни ўз сафига қўшиб олиш ниятида жиддий ҳаракат бошлаган.
Манба таъкидлашича, ҳар икки клуб ҳам ҳужум чизиғини кучайтиришни режалаштираётгани боис, Сергеев каби ҳар бир вазиятни ҳал қила оладиган тажрибали ўйинчи улар учун қимматли таркибий қисмга айланиши мумкин. Эрон футболида рақобат шиддатли, мухлислар талаби баланд. Шунинг учун жамоалар аниқ натижа бериши мумкин бўлган ўйинчига эҳтиёж ортаётгани тушунарли.
32 ёшли форварднинг жорий мавсумдаги ўйини ҳам клубларнинг қизиқишини оширди. «Пахтакор» сафида у 27 та учрашувда майдонга тушиб, 18 марта дарвозани ишғол қилган ва яна 2 та аниқ голли паси билан жамоасига катта ёрдам кўрсатган. Уни жамоанинг асосий ҳужумдаги таянчи сифатида баҳолаш мумкин.
Сергееевнинг «Пахтакор» билан амалдаги шартномаси 2025 йил охиригача кучда. Бу эса клублар ўртасидаги музокараларни яна бир қадам мураккаблаштириши мумкин. Аммо шу билан бирга, Transfermarkt портали футболчининг баҳосини 1 миллион евро атрофида белгилагани унинг халқаро бозордаги нуфузини яққол кўрсатиб турибди.
Эрон футболига кўчиши Игор учун янги босқич, янги муҳит ва янги рақобат даражаси бўлиши эҳтимол. Айниқса, «Истиқлол» ва «Персеполис» каби катта таркиб ва оммавий мухлисларга эга жамоаларда ўйнаш ҳар бир футболчининг тажрибасини оширади, майдондаги руҳий барқарорликни мустаҳкамлайди.
Яқин вақтларда Сергеевнинг келажаги бўйича аниқ қарор белгиланиши кутиляпти. Мухлислар эса ҳозирданоқ у қайси клубни танлашини қизиқиш билан кузатмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
