АҚШ президенти Дональд Трамп яқинлашиб келаётган 2026 йилги футбол бўйича Жаҳон чемпионатига тайёргарлик жараёнлари ҳақида фикр билдирди. Унинг таъкидлашича, Вашингтон ушбу мусобақани нафақат юқори даражада, балки футбол тарихида энг муваффақиятли тарзда ўтказишни мақсад қилган.
Трампнинг айтишича, у ўз маъмуриятига Мундиални ҳар жиҳатдан идеал даражада ташкил этиш бўйича аниқ кўрсатмалар берган. Президент бутун инфратузилма, хавфсизлик, логистика ва мухлислар учун қулайлик масалалари кескин кучайтирилганини таъкидлади.
«Мен барча идораларга 2026 йилги Жаҳон чемпионатини мисли кўрилмаган даражада ўтказишни буюрдим. Менимча, у тарихдаги энг зўр чемпионат бўлади. Чипталар сотувида эса аллақачон рекордлар қайд этиляпти», — деди Трамп.
Шу билан бирга, АҚШ раҳбари Мундиалга келмоқчи бўлган мухлисларга олдиндан ҳаракат қилишни маслаҳат берди. Унинг таъкидлашича, кўплаб мамлакатлар фуқаролари учун АҚШ визасига навбат 60 кунгача чўзилиши мумкин.
«Агар чемпионатга келишни режа қилган бўлсангиз, визани ҳозирданоқ расмийлаштиринг. Навбатлар узун», — дея қўшимча қилди у.
Маълумот учун, 2026 йилги Жаҳон чемпионати 11 июндан 19 июлгача АҚШ, Канада ва Мексикада ўтказилади. Мусобақа тарихда илк бор учта мамлакатда ташкил этилади ва жами 48 та терма жамоа иштирок этади.
Мундиалга қизиқиш юқорилиги, инфратузилмадаги улкан сармоялар ҳамда рекорд даражадаги чипта сотуви — буларнинг барчаси 2026 йилги турнирнинг футбoл дунёсида алоҳида ўрин эгаллашини кўрсатмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
