Садио Мане “Ан-Наср”даги жамоадоши Криштиану Роналду ҳақида очиқ фикр билдириб, унинг меҳнатга бўлган муносабати ва юксак профессоналлигига алоҳида тўхталиб ўтди. Сенегаллик ҳужумчининг айтишича, унда Роналду ҳақидаги тасаввурлар Саудияга келгач янада мустаҳкамланган.
Мане ёшлигиданоқ португалиялик юлдузнинг ўйинларини ТВ орқали кузатиб борган, унинг менталитети ва ўз устида ишлаш маданияти ҳақида кўп эшитган. Лекин юзма-юз кўришганида ҳам у айнан ўша профессионалликни, интизомни ва қатъиятни кўрган.
Унинг таъкидлашича, Роналду нафақат улкан футболчи, балки ўзи билан ишлашдан ҳеч қачон чарчамайдиган, ҳар куни ўзига янги мақсад қўядиган ажойиб инсон. Ёши 40 га яқинлашганига қарамай, унда ғалаба истаги, рақобатга чанқоқлик ва юқори даражада ўйнашга бўлган хоҳиш ҳали ҳам сўнмаган.
Рио Фердинанд билан суҳбатда собиқ “Манчестер Юнайтед” ҳимоячиси Роналду ҳали ҳам машғулотларга биринчи келиб, охирида кетадими, деб сўраганида Мане шундай жавоб берди:
Унинг фикрича, Роналду олдинги йиллардаги каби доимо биринчи келмаслиги мумкин, аммо барибир машғулот маданияти унинг қонида бор. У эрта келади, маҳоратини сайқаллайди ва бошқалар сингари жамоавий интизомга риоя қилиб ҳаракат қилади. Энг муҳими эса — унинг жамоага кўрсатган таъсири. Мане бу таъсирни “беназир” деб баҳолади.
Сенегаллик ҳужумчининг сўзларига қараганда, Роналдунинг майдондаги ва машғулотдаги жонкуярлиги ҳамон барчага намуна бўлиб хизмат қилмоқда. Унинг ҳар бир куни, ҳар бир ҳаракати ва ҳар бир қароридан профессионал спортга хос жиддийлик билиниб турибди.
Мане хулоса қилиб, Роналду билан бир жамоада ўйнаш ҳар қандай футболчи учун улкан тажриба ва бахт эканини таъкидлади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
