Европа трансфер бозори яна қизий бошлади — бу сафар марказда “Реал”нинг юлдузга айланаётган ёш иқтидори Арда Гюлер турибди. Испания ва Англия матбуотининг ишончли манбалари – Defensa Central ва Fichajes – ёзишича, “Манчестер Сити” раҳбарияти Гюлерни трансфер қилиш имконини жиддий ўрганмоқда ва унинг ўтиши учун 100 миллион евро атрофидаги рекорд пакет тайёрламоқда.
Бу сумма амалга ошса, Арда Гюлер “шаҳарликлар” тарихидаги энг қиммат трансферлардан бирига айланади. Мураббийлик маҳорати билан машҳур Хосеп Гвардиола эса Гюлернинг техникаси, ўйинни кўриш қобилияти ва универсал позицион имкониятлари унинг тактик тизимида идеал мос тушишига ишоняпти.
Гюлер “Реал” учун стратегик лойиҳа қисми
Хаби Алонсо қўл остида Гюлернинг мавқеи янада ошди. Испания клуби уни шунчаки перспектив футболчи сифатида эмас, балки келажак лойиҳасининг ажралмас устуни сифатида кўряпти.
Мадрид клуби уни 2029 йил 30 июнгача узоқ муддатли шартнома билан боғлаб қўйгани ҳам бежиз эмас — бу клубнинг Гюлерга бўлган ишонч даражасини кўрсатади.
Transfermarkt маълумотларига кўра, турк вундеркинднинг ҳозирги бозор қиймати 60 миллион еврони ташкил этади. Аммо “Сити” унинг ҳақиқий салоҳияти бундан икки баравар юқори эканига ишоняпти.
Нима бўлади?
Агар “Сити” расман таклиф юборадиган бўлса, бу қишдаги энг катта трансфер шоусига айланиши мумкин. Бироқ “Реал” томони бунга қаршиликсиз йўл қўйиши амримаҳол — Мадрид клуби Гюлерни ўз келажагининг марказий фигураларидан бири сифатида кўрмоқда.
Европа матбуоти айтмоқда: агар Гвардиола бу битимга жиддий киришса, 2026 йил трансфер бозоридаги энг катта портлаш шу футболчи билан боғлиқ бўлиши мумкин.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
