Каталония гранди ёзги трансферлар даврини жиддий ўзгаришлар билан бошлаш ниятида. Клуб раҳбарияти ҳимоя ва ҳужум чизиғини Бундеслигада тажрибали, юқори даражадаги ўйин кўрсатаётган футболчилар билан кучайтириш режасини йўлга қўйган. Mundo Deportivo нашрининг ёзишича, жамоа айнан Германия чемпионатида порлаётган тўрт нафар футболчига жиддий қизиқиш билдирмоқда.
Маълумотларга қараганда, “Барселона” ҳимоя чизиғини икки йирик ном билан мустаҳкамлашни кўзламоқда. Уларнинг илк мақсади — “Бавария” ва Франция термасининг кучли марказий ҳимоячиси Дайо Упамекано. Унинг Мюнхен клуби билан амалдаги шартномаси 30 июнда якунланади, бу эса каталонияликларга уни бепул олиб келиш имконини беради. Ҳамён учун енгил, ҳимоя учун кучли вариант — клуб бундай имкониятни қўлдан чиқармоқчи эмас.
Иккинчи номзод эса “Боруссия Дортмунд”нинг ажойиб даражада ўсишда давом этаётган 25 ёшли ҳимоячиси Нико Шлоттербек. Унинг ўйини, техник маҳорати, позицион фикрлаши “Барселона”нинг талаблари билан тўлиқ мос келади. Дортмундлик футболчининг баҳоси тахминан 40 миллион евро атрофида бўлиши айтилмоқда. Каталония клуби бу маблағни тежаш учун вариантлар қидирмоқда, аммо қизиқиш жуда жиддий.
Ҳимоядаги режалар билан чекланмаган ҳолда, клуб ҳужум чизиғини ҳам қайта қуриш ниятида. Ханс-Дитер Фликнинг режаларига кўра, жамоада гол уриш масъулиятини зиммасига оладиган, ўйин интилишини оширадиган янги тўпурарлар керак. Шу боис “Бавария” суперҳужумчиси Ҳарри Кейн ва “Боруссия Дортмунд” форварди Серу Гирасси клубнинг трансфер рўйхатига киритилган.
Кейн — тажрибали, ишончли, голига кафолати бор ҳужумчи. Гирасси эса сўнгги мавсумларда Бундеслигада юқори суръатда ўсиб, энг кўп гол урувчи футболчилардан бирига айланди. Иккиси биргаликда жамоанинг олдинги чизиғини тубдан ўзгартириши мумкин. Бир нечта манбалар таъкидлашича, ҳар икки ўйинчини олиб келиш учун камида 65 миллион евро талаб этилади, бу эса “Барса” учун жиддий, бироқ ҳозирги шароитда ўринли инвестиция ҳисобланади.
Клуб атрофидаги манбалар айтишича, Фликнинг асосий мақсади — жамоани қайта қуриш, тактик жиҳатдан янада универсал ва истеъдодларга бой таркиб тузиш. Германия чемпионатида улкан тажриба орттирган футболчиларнинг келишини айнан шу стратегиянинг бир қисми сифатида кўриш мумкин.
Каталонияда трансфер режалари тобора қизияпти, ишқибозлар эса очиқча кутмоқда: агар ушбу тўртликдан камида учтаси келса ҳам, “Барселона” янги мавсумни мутлақо бошқача руҳият билан бошлаши турган гап.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
