Каталонияда трансфер масалалари яна қизий бошлади. “Барселона” жамоаси ҳужум чизиғини кучайтириш мақсадида янги номзодларни кўриб чиқмоқда ва улар орасида энг жиддий вариант сифатида “Челси” таркибида ҳаракат қилаётган Педру Нету тилга олинмоқда. Бу ҳақда “Fichajes” нашри маълум қилди.
Манбалар ёзишича, агар Рафинья жамоани тарк этишга қарор қилса, Нету унинг тўғридан-тўғри ўрнини эгаллаши мумкин бўлган етакчи номзодлардан бири ҳисобланади. Португалиялик футболчининг трансфери клубнинг спорт директори томонидан ҳам қўллаб-қувватланаётгани маълум. Демак, “Барса”да унинг ўйин услубига, тезлигига ва қанотдаги универсаллигига жиддий ишонч бор.
Педру Нету ҳозирда “Челси” билан 2031 йилгача амал қиладиган узоқ муддатли шартномага эга. Унинг трансфер қиймати “Трансфермакт” порталида 55 миллион евро атрофида баҳоланган. Бу рақам каталонияликлар учун арзон деб бўлмайди, бироқ тактик жиҳатдан муҳим ўзгаришлар режалаштирилаётганини ҳисобга олганда, бундай инвестиция ҳақли бўлиши мумкин.
25 ёшли вингер жорий мавсум Лондон клуби сафида 16 та учрашувда майдонга тушиб, 4 та гол ва 2 та аниқ ассист билан иштирок этди. Унинг майдондаги ўйини, айниқса, пастдан ҳужумни қуриш, тезкор ўзгаришлар қилиш ва рақиб ҳимоясини ёриб ўтишдаги маҳорати билан кўпчиликнинг эътиборини тортган.
“Барселона”да эса ҳозирги пайтда қанотдаги рақобат кучли, аммо Рафиньянинг келажаги борасидаги ноаниқлик клубни янги вариантларни олдиндан кўриб чиқишга мажбур қилмоқда. Нетунинг ёшлиги, динамикаси ва универсал ўйин услуби Флик режаларига тўла мос келади.
Агар музокаралар ижобий натижа берса, португалиялик футболчи ёзги трансферлар даврида “Камп Ноу”да пайдо бўлиши мумкин. Мухлислар эса бу янгиликни қизиқиш билан кузатмоқда — чунки қанотда янги энергия, янги тезлик ва янги рақобат жамоага фойдадан бошқа нарса бермайди.
Меҳмон гуруҳидаги фойдаланувчилар ушбу мақолага изоҳ қолдира олмайди.
