Туркия Суперлигасининг 12-турида яна бир ҳаяжонли ва голларга бой учрашув кузатилди. “Истанбул Башакшеҳир” ўз майдонида “Трабзонспор”га қарши майдонга тушиб, қаттиқ кураш шароитида 3:4 ҳисобида мағлубиятга учради. Аммо ўйиндаги энг ёрқин лаҳзалардан бири — Ўзбекистон миллий терма жамоаси сардори Элдор Шомуродовнинг голи бўлди.
Учрашувнинг 45-дақиқасига келиб, Шомуродов жамоаси учун муҳим зарбани йўлга қўйди ва “Манчестер Юнайтед”нинг собиқ дарвозабони Андре Онана қўриқлаётган дарвозани ишғол қилди. Бу гол нафақат ўйин суръатини кескин ўзгартирди, балки Элдорнинг мавсум давомидаги барқарор формасини яна бир бор тасдиқлади.
Беллашувдан кейинги рейтинглар ҳам ҳамюртимизнинг ўйини юқори баҳоланганини кўрсатади:
– Fotmob: 7.2 балл
– Sofascore: 7.1 балл
– Flashscore: 6.9 балл
Бу натижалар Шомуродовнинг ўйинда нафақат гол уриши, балки умумий ҳаракатлари, жамоа учун қилган фидокорона меҳнати ва позицион ўйини ҳам эътибордан четда қолмаганини англатади.
Маълумки, Элдор Шомуродов бу мавсум Туркия Суперлигасида ўз номини тўпурарлар орасида тобора юқориларга олиб чиқмоқда. Унинг ҳисобидаги голлар сони 9 тага етди ва айни пайтда у лигaнинг тўпурарлар рўйхатида биринчи ўринни эгаллаб турибди. Бу кўрсаткич – Элдорнинг Туркиядаги фаолияти қанчалик муваффақиятли ва изчил давом этаётганининг ёрқин исботи.
Шомуродов ҳозирги кунда “Башакшеҳир”нинг асосий етакчиларидан бири сифатида тан олинган. У нафақат ҳужумларнинг тайёрлов қисмида, балки охирги зарбада ҳам жамоага асосий таянч бўлиб келмоқда. Ҳар бир ўйиндаги қайсар руҳи, келишган ҳаракатлари ва профессионал ёндашуви туфайли Элдор мухлисларнинг олқишига сазовор бўлмоқда.
Кўриниб турибдики, голдан гол, баҳсдан баҳс Шомуродовнинг нуфузи ошмоқда. Келгуси турларда ҳам ўйини шу суръатда давом этса, у мавсумни Суперлиганинг расмий тўпурари сифатида якунлаши эҳтимоли жуда баланд.
Мухлислар эса ҳозир ҳамюртларимизнинг навбатдаги голини кутиб, ҳар бир учрашувни олий даражадаги интизорлик билан кузатиб боришмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
